Sapit Premier Sarawak, Datuk Amar Dr Sim Kui Hian madah ke chara ngaul mayuh raban besai reti nentuka raban ditepan penyakit nya ulih berubat sereta nerima bantu.
Ku iya, Sarawak ngerikod 205 kes HIV baru ba taun 2025 dibanding 224 kes ba taun sebedau nya, lalu mandangka kes bisi nurun 8.4 peratus.
“Enti orang ke sakit enda diputar sereta dipatau manah, penyakit tu ulih ngerekai tauka tikas pengerai sida majak raya.
“Tu mandangka semua raban patut besaup ngesan tanggungpengawa diri,” ku iya maya dirandau media pengudah program bejadi Teratak Kasih Tok Nan ditu, Hari Dua.
Datuk Amar Profesor Dr Sim madah ke palan sukung komuniti baka Teratak Kasih Tok Nan nyadi jematan entara orang ke sakit enggau servis pengerai perintah, lebih agi nentuka pengawa berubat ditandu enggau nadai penanggul.
Berindik ari nya, ku iya, Bagi Menua Bintulu agi ngerikod kes HIV pemadu tinggi ba Sarawak, iya nya 13 kes ungkup tetiap 100,000 peranak, taja trend bisi nurun.
Ku iya, pekara nya begunaka cara ti komprehensif agi nyengkaum kaul tuai komuniti enggau gerempung voluntia ba menua.
Kelimpah ari nya, Sapit Menteri Pengerai Malaysia, Dato Hanifah Hajar Taib madah sukung emosi enggau alai ti positif beguna dikena mantu orang sakit berubat.
Ku iya, peragam agi nyadi faktor besai nekul orang sakit ari berubat tumu.
“Lebuh rayat mereti ke agi pekara HIV, orang sakit andal agi deka berubat,” ku iya.
Iya madah pengeran munas HIV begunaka pengeransing timpuh panjai sereta kerejasama ari semua renggat rayat.
Ku iya baru, chara bepelasarka komuniti deka terus nyadi pugu nempa sistem sukung ti tegap enggau efektif ba Sarawak.-EDISI UKAS
