MTPMA63 Negap Kerejasama Servis Perintah Sabah & Sarawak
KUCHING: Perintah Sarawak majak ransing ngenegap kerejasama strategik nengah Perintah Besai ba pekara servis perintah, seriris enggau semangat sereta juluk Sempekat Malaysia 1963 (MA63).
Sekretari Perintah Sarawak, Datuk Amar Mohamad Abu Bakar Marzuki madah, pengawa ngatur Aum Komiti Kereja Bekaul Servis Perintah Nengeri Sabah enggau Sarawak ari baruh Kaunsil Pengatur Pejalai Sempekat MA63 (MTPMA63) Bilangan 1 Taun 2026 madangka pengeransing enggau pemeras kededua raban.
Ku iya, aum nya signifikan ba nentuka pekara bekaul tusun servis, pangku pengawa, pemansang modal mensia sereta pengelantang orang gawa perintah ulih ditisih enggau lurus sereta inklusif.
“Perintah Sarawak meri terima kasih ngagai Perintah Besai lebih agi Opis Servis Perintah ba nyeraris pekara servis perintah ba Sarawak enggau Sabah.
“Perintah nengeri seruran ransing meri kerejasama dikena nentuka tetiap pemutus ke dijapai meri pemaik timpuh panjai ukai semina ba servis perintah tang ngagai selampur rayat,” ku iya.
Iya madah munyi nya maya bejaku ba Pengerami Makai Lemai Serimbai Aum Komiti Kereja Bekaul Servis Perintah Sabah enggau Sarawak nengah MTPMA63 ditu, Hari Dua.
Datuk Amar Mohamad Abu Bakar mega meri terima kasih ngagai Tuai Direktor Servis Perintah Malaysia, Tan Sri Wan Ahmad Dahlan Abdul Aziz sereta deligit ari Opis Servis Perintah enggau Perintah Sabah ke datai.
Iya andal ke aum nya ulih meri pemutus komprehensif, inklusif sereta meri pemaik lama ba pengeran ngenegap atur perintah sereta numbuh sistem servis perintah ti meruan ba Sabah enggau Sarawak.
Sama datai, Sapit Direktor Tuai Direktor Servis Perintah Malaysia, Datuk Dr. Mohd Bakri Ismail, Sapit Tuai Direktor Servis Perintah Nengeri Sabah, Aidah Awang, Sapit Sekretari Perintah Sarawak (Perambu Ekonomi enggau Pemansang), Dato Sri Dr. Muhammad Abdullah Zaidel, Penyanding Penemu Ba Opis Premier Sarawak, Datuk Amar Jaul Samion sereta temuai dipebasa ke bukai.-EDISI UKAS
