DOI TUNG: Deligit betuai ke Sapit Menteri Pemansang Indu enggau Nembiak Mit, Datuk Rosey Yunus udah ngatur penemuai gawa ke Projek Pemansang Doi Tung, siti inisiatif pemansang komuniti di baruh Yayasan Mae Fah Luang dikena ngulih ke peneleba enggau belajar ke pengawa pemadu manah ba pemansang begulai bepuguka komuniti.

Ba penemuai nya, deligit udah diberi penerang pasal sejarah numbuh enggau pejalai projek ari Direktor Projek Pemansang Pemeruan Doi Tung, Thanit Kongkaew ti nerangka chara transformasyen sosioekonomi komuniti nengah dagang sosial, pemansang pengelandik enggau kaul regas komuniti menua.

Bela datai mendingka penerang nya Pegawai Tadbir Diplomatik, Azri Hazwani Abdul Aziz, sereta Pemantu Penerang, Amanah, di Kedutaan Malaysia di Bangkok, Thailand, ti bela bekunsi penemu bekaul pengulih kerejasama enggau besilih penemu entara kededua raban.

Tuju penemuai gawa nya mereti ke agi pasal model pemansang begulai ti dikena Doi Tung, kelebih agi ba pengawa transformasyen penatai pemisi komuniti ari aktiviti ekonomi enda meruan ngagai dagang ti tegap agi, ulih beretan enggau meri empas timpuh panjai.

Kelimpah ari nya, penerang pasal pengawa negap indu enggau ruang bilik ari sukut ekonomi ari pengawa betanam betupi meruan, asil krafjari, enggau industri nilai tambah ti nyelinting ngulih penatai pemisi tegap ngagai komuniti menua nya.

Penemuai gawa nya mega ngerandang peluang berandau ke pekara atur pengawa, model belanja enggau mekanisme pemeruan timpuh panjai ti nyadi pugu pengelantang komuniti, lalu ulih nyadi malin ngaga polisi enggau program pemansang komuniti di Malaysia.-EDISI UKAS