BANGKOK: Siti penemuai gawa ke Palan Sains Halal Thailand, Universiti Chulalongkorn, dikena ngiri penemu enggau mereti ke pemesai guna sains halal nentuka kualiti, pengelikun enggau nipak standard halal ba sepanjai rentayan bekal produk.
Ba penemuai nya, Direktor Palan Sains Halal Thailand, Dr. Pornpimol Mahamad udah bekunsi penerang bekaul pemansang enggau ngaga produk halal bala komuniti di Thailand, nyengkaum ngena chara sains enggu teknologi dikena nentuka jamin integriti halal.
Sama datai mending penerang nya bala pemansik palan nya iya nya Dr. Najwa Yanya Santiworakun, Dr. Acharee Suksuwan, Dr. Nureesun Mahamud, sereta Jasmine Manee, ti sama nerang pemesai guna pansik enggau servis makmal dikena nyukung ekosistem halal menua nya.
Batang tuju penemuai nya ngambi mereti ke agi semua pasal pemesai guna sains halal nentuka pengawa nangkup standard halal ti terit, kelebih agi ari sukut pengelikun pemakai, pengelurus rentayan bekal enggau penemban produk.
Kelimpah ari nya, penemuai nya mega meri penerang pasal baka ni pansik, servis makmal enggau servis sanding penemu teknikal ti disediaka Palan Sains Halal Thailand mantu dagang mikro, mit enggau jelan pemesai (PMKS) nangkup atur setipikit halal, lalu nambah pengulih produk besemekih ba makit antarabansa.
Penemuai gawa nya mega meri peluang nyerungkai pengawa pemadu manah ba integrasyen jamin halal enggau inovasyen sereta nangkup peminta makit global ti majak berati ke pekara kualiti, pengelikun enggau pengandal penguna.-EDISI UKAS
