SEMOP: Peranak menua di sitak Kunsil Nengeri (DUN) Semop nerima belanja pemansang urung RM5.5 juta bantu belanja Projek Mit Menua Pesisir (MRP) enggau projek Program Transformasyen Menua Pesisir (RTP).

Agih belanja nya ke diberi Sapit Menteri ba Opis Premier Sarawak (Pekara Korporat, Pemadah enggau UKAS) ti mega Kaban Kunsil Nengeri (ADUN) Semop, Datuk Abdullah Saidol maya penemuai gawa ngagai menua nya.

Ku Datuk Abdullah, ari penyampau, RM846,000 belanja MRP udah diagih ngagai 20 penerima, lalu RM671,000 diagih dikena ngaga macham projek mit perengka guna mensia mayuh genturung pendiau, nyengkaum ngaga alai engkah kerita, nyeleti pendai, ngaga sereta nyeruri jalai genturung pendiau, masjid enggau balai mensia mayuh.

Kelimpah ari nya, ku iya, sepenyampau RM175,000 agi diungkupka ngagai aktiviti rayat enggau program sekula, lalu 18 projek RTP beungkus RM4.65 juta mega deka belabuh digaga ba pun taun tu dikena nyungkak pengelantang menua pesisir ba DUN Semop.

Iya mega madah ke pemesai reti atur ti manah ba menua alai semua tuai Komiti Pemansang enggau Pengelikun Genturung Pendiau (JKKK) ngatur agih belanja projek mit genturung pendiau enggau chukup pengelurus.

Nerang bekaul pemansang kandang menua pesisir, Datuk Abdullah madah, pengeransing perintah Sarawak nyengala lebuh lebih 60 peratus tauka urung RM6 bilion agih belanja ari bajet pemansang diungkup ngagai kandang menua pesisir.

“Pengawa ngaga 16 jematan beungkus lebih ari RM6 bilion, baikka udah tembu tauka benung digaga mega dipejalai ba kandang menua pesisir.

"Semua tu ulih digaga lebuh tuai kitai landik ngatur perambu pemansang enggau penatai pemisi nengeri, ” ku madah ngagai media, Hari Empat.

Iya mega madah, inisiatif tu mandangka pemansang menua pesisir dikemerat Perintah Sarawak, seriris enggau pengeransing nambah manah pengelantang rayat pesisir.

Penemuai gawa nya nyerangkung empat palan iya nya Tekajong, Sedi, Serdeng enggau sekeda rumah panjai di Sungai Sian, enggau penatai 20 Tuai Genturung Pendiau enggau Tuai Raban Bansa (KMKK), 20 Tuai Rumah, empat pengari Gerempung Apai Indai enggau Pengajar (PIBG), empat serakup, dua pengari masjid sereta bala mayuh ke bukai.-EDISI UKAS