KUALA LUMPUR: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngulu Forum Ekonomi Malaysia (FEM) 2026 ti diatur ba Palan Konvensyen Kuala Lumpur (KLCC), ditu, Hari Empat.
Forum nya dipenyadi Menteri Besai, Datuk Seri Anwar Ibrahim.
Ba jaku pengelalu bejadi ke program nya, Datuk Seri Anwar Ibrahim muji iring tuai Datuk Patinggi Abang Zohari, lebih agi bekaul ubah sereta pemansang ba bidang teknologi baru.
“Aku rindu ati enggau penatai iya ukai semina bakih menteri, tang mega sukung baka Premier Sarawak, Abang Johari, siku tuai ngembuan runding timpai jauh nyungkak ubah ba bidang teknologi baru,” ku iya.
Kelimpah ari nya, Menteri Ekonomi Malaysia, Akmal Nasrullah Mohd Nasir madah, FEM 2026 siti pelasar perintah enggau 'stakeholder' dikena netapka tuju ekonomi menua.
Ku iya, forum nya berati ke pejalai polisi ti deka dipasuk terus ngagai Langgur Pemansang Malaysia Lumpar Ke-13 (RMK-13).
Sama datai ba program nya, Sapit Menteri Besai, Datuk Amar Fadillah Yusof, raban Menteri Kabinet, tuai industri sereta pengari sektor korporat enggau akademik.
Ke penemu mayuh, FEM 2026 iya nya kali kedua Forum Ekonomi Malaysia lalu diatu diaku nyadi pelasar menua ba pengawa nyungkak agenda sosioekonomi.
Berambaika jaku Accelerating Growth, Advancing Malaysia, forum taun tu berati ke pengeransing ngerumban pemansang menua setipak enggau juluk ati RMK-13 (2026–2030).
FEM 2026 ngempuru 'stakeholder' dikena berandauka macham isu strategik nyengkaum polisi ekonomi, pengawa meranak puku, Artificial Intelligence, kuasa meruan, pemansang penau, pengawa berumah ulih dibeli enggau reformasyen pengerai.-EDISI UKAS
