MUMBAI: Sarawak ngenegapka penuduk nyadi palan pintu penama ke Borneo nengah berati ke makit India nyadi penatai temuai, seriris enggau juluk nasional manggai Taun Nemuai Ke Malaysia 2026 (VM2026).

Kaunsil Dagang Temuai Sarawak (STB) mujur ngambi bagi ba Outbound Travel Mart (OTM) 2026, pemandang dagang temuai tebilang India ti diatur ba Palan Konvensyen Jio World ditu.

STB ba siti penerang media kena Hari Empat madah, Sarawak nyemetak madah pengeransing strategik iya ba makit India ke ditentu nyadi makit pemansang besai dikena nyaup juluk Malaysia nerima 43 juta temuai antarabansa, nyengkaum juluk dua juta penatai temuai ari India nengah VM2026.

Setipak pematak makit ti nambah, nyengkaum peminta ke betambah sepenyampau lapan peratus ari India, Sarawak ngeletakka diri nyaup tuju nasional nengah pemansang dagang temuai ti meruan, bekualiti sereta berega tinggi.

Deligit Sarawak ti betuai ke Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah enggau Sapit Menteri Dagang Temuai, Industri Kreatig enggau Seni Pemerindang Sarawak, Datuk Sebastian Ting, Chairman STB, Dato Dennis Ngau sereta Tuai Pegawai Eksekutif STB, Dr Sharzede Salleh Askor.

Penatai pemesai tu mandangka pengeransing Sarawak ba ngenegap atur renggat tinggi begulai enggau pemekuh industri dagang temuai India, lalu nambah pengandal makit timpuh panjai ke nempa Sarawak nyadi palan ditapat.

Mandangka pengawa tuai Sarawak ba renggat antarabansa, Dato Sri Abdul Karim bela ngenataika jaku pengelalu iya sereta nyadi kaban panel maya Program Bejadi OTM 2026, ti mandangka Sarawak besikap nipak peminta dagang temuai ari India ti majak betambah.

Kelimpah ari nya, Dr Sharzede bela nyadi kaban panel ba Forum OTM berambaika jaku “Beyond the Usual: Mapping Where Indian Travellers Will Go Next”, bekunsi penemu bekaul tikas besikap palan ditapat ba Sarawak sereta strategi pemansang produk dikena nangkup peminta temuai India.

Ba OTM 2026, Sarawak dilakuka nyadi palan ditapat bepelasarka peneleba nengah mandangka pugu dagang temuai mungkur Budaya, Pejalai, Rampa Menua, Pemakai enggau Pengerami Festival (CANFF).

Peneleba imersif bepelasarka rampa menua dikemerat sereta pesaka budaya ti kaya, seriirs enggau peminta makit India.

Entara palan ti dikelakuka nyengkaum Taman Negara Gunung Mulu enggau Taman Negara Niah ke dirintai nyadi Palan Pesaka Dunya UNESCO, lalu ngenegap imej Sarawak nyadi palan ditapat rampa menua tikas dunya.

Sebedau bejadi OTM 2026, deligit Sarawak ti betuai ke Dato Sri Abdul Karim mega ngatur penemuai basa ngagai Konsulat Jeneral Malaysia ba Mumbai betemu enggau Konsul Jeneral Malaysia, Ahmad Zuwairi Yusoff.

Penemuai nya ditampung enggau juluk kerejasama akademik ngagai Universiti Somaiya Vidyavihar begulai enggau Kampus Sarawak Universiti UCSI dikena ngelakuka dagang temuai pelajar ti ditentu nyadi segmen khas bisi pengulih sebaka ba makit India.

Tuju kerejasama tu dikena nyadika lalau akademik ba bidang hospitaliti, dagang temuai enggau seni kulinari nengah besilih pengelicha enggau nembiak sereta pansik begulai, lalu nyaup pemansang penau enggau ekosistem dagang temuai timpuh panjai.

OTM 2026 nyadi pelasar strategik dikena ngangkat Sarawak ba makit India, ngenegap kaul dagang temuai sereta ngentapka penuduk iya nyadi pintu penama Malaysia bepelasarka rampa menua ke Borneo.-EDISI UKAS