Hari Besai Pelasar Negap Penyerakup & Pengelantang Ba Sarawak
KUCHING: Pengerami Switching On Chinese New Year Lighting 2026 di White Cat, Padungan nyadi lambang penyerakup rayat Sarawak ti sama ngerami macham budaya enggau ati lantang.
Sapit Premier Sarawak, Datuk Amar Profesor Dr Sim Kui Hian, madah pengerami ngintu hari besai di Sarawak ukai semina diintu siti raban bansa aja, tang dirami semua rayat nengeri tu.
Ku iya, pengawa ngelagu kelai menua White Cat di Padungan serimbai Taun Baru China mandangka semangat Sarawak ti ngerami macham budaya chara inklusif.
“Tetiap hari besai, mayau ikonik tu deka ngena kostum baru. Tu mih semangat Sarawk, ke alai tetiap hari besai diintu semua raban bansa,” ku iya maya bejaku ba Pengerami Switching On Chinese New Year Lighting 2026 di White Cat, Padungan, ditu, Hari Empat.
Ku iya semangat nya setipak enggau gela Kuching nyadi Mengeri Penyerakup enggau Mengeri Pengelantang, ti berati ke pangku pengawa semua nentuka pengelantang rayat terus dijaga.
Iya madah, pengawa ngintu hari besai mega beguna dikena nempa kaul lantang enggau ngelalu pemulai anak Sarawak ba luar nengeri serimbai ngintu hari besai.
“Kitai deka sita pulai ngasai ke Sarawak tu rumah sida, siti nengeri ti seruran ngelalu ke pemulai rakyat iya enggau chukup pengaga,” ku iya.
Berebak enggau nya, Datuk Amar Dr Sim mega madah ke Pengerami Ngintu Taun Baru China Perintah Sarawak deka diatur hari keterubah hari besai nya ba Palan Konvensyen Borneo Kuching (BCCK).
Iya madah ke pengerami nya deka mandangka pemerindang penau menua nyadi pengeransing ngelakuka seni enggau budaya menua, seriris enggau juluk pemansang Sarawak ti inklusif enggau meruan nengah Strategi Pemansang Pengudah COVID-19 (PCDS) 2030.
“Tu mandangka pengelantang, inklusiviti sereta pemeruan ti nyadi pugu pemansang Sarawak,” ku iya.
Kelimpah ari nya, Datuk Bandar Kaunsil Mengeri Kuching Selatan (MBKS), Dato Wee Hong Seng, madah konsep White Cat ti dias taun tu ditibak ari rambai jaku Taun Kuda ti nyadi lambang pemansang, peneras enggau pemujur.
Ku iya, tukuh nya ngenang juluk pemansang nengeri nyengkaum pejalai sistem Pengangkut Aliran Automasi (ART).
“Enti diperati, mayau tu baka orang ke mai perengka pengangkut nya enggau jalai ba mua, mandangka pejalai ke mua sereta tuju pemansang Sarawak,” ku iya maya dirandau media.
Iya nyemetak madah ke MBKS seruran nyukung visyen pemansang Perintah Sarawak enggau meransang rayat ngambi sama meri sukung sereta perambu bejalaika tetiap inisiatif digaga.
“Beri awak ngagai siti perambu dipejalai. Enti bisi penemu, kenataika enggau chara ti manah ngambi kitai ulih nambah manah,” ku iya.
Iya mega madah, pengawa ngelagu Taun Baru China sekali tu mega ngemerat elemen pemeruan, baka ngena tayar enggau pemeri lampu tanglung ari komuniti menua.
Ku iya, kaul komuniti enggau sektor peribit mandangka tikas pengandal ke atur mengeri sereta semangat segulai ba ngemansangka Kuching.
“Kitai deka semua raban megai tanggungpengawa diri sereta bela besaup nuju nempa mengeri sereta nengeri ti mansang agi,” ku iya.
