KUCHING: Sarawak enggau Brunei Darussalam terus ngenegap kerejasama ekonomi serantau nengah penemuai gawa deligit Brunei Economic Development Board (BEDB) ngagai Sarawak kena Hari Empat ti diperati ulih meransang dagang ngilah menua sereta matak pengawa meranak puku baru entara kededua kandang menua.

Penemuai gawa ti diseraris Opis Menteri Dagang Antarabansa, Industri enggau Meranak Puku Sarawak (MINTRED) enggau kerejasama BIMP-EAGA Business Council (BEBC) enggau Sarawak Business Federation (SBF) nya sebagi ari pengawa ngerapitka kaul ekonomi dua menua ti udah lama ditanggam.

Sekumbang penemuai gawa nya, lebih 15 kompeni ari macham sektor ngulu program nangkup dagang enggau rentayan industri, lalu meri peluang ngagai dagang Brunei nemu gaya dagang Sarawak nyengkaum pekara atur, struktur ungkus sereta pengulih meranak puku ke bisi.

Berebak enggau nya, deligit BEDB ti betuai ke Norlela Suhailee enggau Konsul Jeneral Brunei Darussalam di Sarawak, Sheikh Abdul Mahdani Dato Paduka Sheikh Abdul Gani, udah ngatur penemuai basa ngagai Sapit Menteri Dagang Antarabansa, Industri enggau Meranak Puku Sarawak, Datuk Dr Malcolm Mussen Lamoh.

Penemuai basa nya mega disempulang Sekretari Mendam MINTRED, Datu Lester Matthew.

Penemuai basa nya mandangka pengeransing kededua menua negap kaul ekonomi enggau ngerembai kerejasama strategik, lebih agi ba sektor besai baka kuasa, pengelikun pemakai, akses makit dagang mit enggau jelan pemesai (PKS) sereta pemansang industri bepengulih.

Opis Sarawak Trade and Tourism Office, Brunei Darussalam (STATOB) deka majak megai tanggungepengawa ngemuntang nangkan randau entara kompeni tibekaul dikena nentuka pengulih kerejasma dikelala ulih nempa asil nyengala sereta bela meri penguntung.

Penemuai gawa BEDB tu mandangka pengeransing begulai Sarawak enggau Brunei Darussalam ba negap rentayan dagang, kaul dagang sereta ngadaka peluang pemansang baru ungkup dagang kededua makit.-EDISI UKAS