BETONG: Atlit Sarawak deka terus diberi latih sereta konsisten bepekit nentuka pemansang penau lumba nengeri majak tegap.
Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu madah, inisiatif nya dipejalai taja bisi sekeda achara enda dipekit ba pengerami Lumba Malaysia (SUKMA) XXII Selangor 2026.
Ku iya, Sarawak tetap ngatur sereta mekit achara nya ba pengerami Lumba Sarawak (SUKSAR) IV 2026 dikena nentuka atlit ti bekaul ulih nampung latih berenggat sereta enda badu baka nya aja.
“Ambi ke banding, achara taekwondo ba SUKMA Selangor ila enda mekit kategori poomsae. Taja pia, achara nya tetap diatur ditu dikena nentuka atlit bekaul ulih konsisten nampung latih sereta enda ngetu pia aja. Pia mega sekeda achara bukai ti dipekit ditu, taja enda dipekit ba SUKMA Selangor.
“Ungkup atlit baru, pekit tu nyadi pelasar keterubah ngagai sida ngasai peneleba bepekit belaban enggau zon bukai. Inisiatif tu ukai semina nyungkak pengandal diri, tang mantu nentu pengulih atlit ti ulih diangkat ngagai tikas ke tinggi agi.
“Berebak enggau nya, raban opis menteri seruran meransang pengawa ngatur macham pekit, berengkah ba renggat domestik enggau kandang menua, nangkan nya ngerandang jalai ngambi bagi ba renggat antarabansa,” ku iya.
Iya madah munyi nya maya dirandau pemberita Unit Komunikasi Awam Sarawak (UKAS) pengudah ngemata pekit Taekwondo, ditu, Hari Empat.
Iya ti mega Chairman SUKSAR IV 2026 bela ngelalau raban gerempung lumba ba Sarawak ngambi terus chakah ngembing atlit ari baruh sida ngambi nengeri tu seruran ngembuan pelapis mai nama Tanah Kenyalang ngagai tikas ke tinggi agi.
Ngenang pekara bukai, Datuk Gerald mega madah kediri tepantup ati ba atur SUKSAR IV 2026 naka sehari tu, ke alai, ku iya, empai nerima ripot sebarang penanggul nyengakum pengawa ngatur lumba ba Sri Aman.
Berindik ari nya, iya ngelalau atlit ngena peluang tu nyadi atlit ti nyulut ba dudi hari.
“Bepekit enggau pemadu manah laban alah tauka menang nya endang adat bepekit tang enti kitai udah bepekit enggau pemadu manah, kitai deka nempa maya tu nyadi peneleba dikena nempa diri nyadi siku atlit ti nyulut agi dudi hari,” ku iya baru. -EDISI UKAS
