LUBOK ANTU: Sarawak majak ransing nyikap atlit dikena ngetan gelar champion Lumba Malaysia (SUKMA) 2026 ti diatur di Selangor bulan Ogos ila.
Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu madah ke pengawa besikap atlit diatu ba ‘gear tiga’ dikena nurun ke kelang ba pekit dua taun sekali nya.
“Ungkup lumba bukai, endang ari pengawa besikap, ari latih, endang benung dipejalai. Mayuh diadu kitai mega, sebedau napi SUKMA, bisi sekeda bansa pekit deka diatur, lebih agi ba Kuching.
"Asai aku (pengawa besikap) kitai udah ba gear tiga," ku iya maya dirandau nangkan ngelawa venue achara karate Lumba Sarawak (SUKSAR) IV 2026 ba Balai Besai IPD Lubok Antu, Hari Lima.
Sama datai, Kaban Parlimen Lubok Antu Roy Angau Gingkoi, Pemangku Tuai Pegawai Eksekutif (CEO) Kaunsil Lumba Sarawak (SSC) Khairul Nizam Morshidi enggau temuai dipebasa bukai.
Nerang bekaul skop latih, Datuk Gerald madah mayuh atlit udah belabuh nitih latih intensif ba dalam enggau luar menua dikena nambah manah tikas penyulut sida.
Kelimpah ari nya, hari kedua pengerami SUKSAR majak richah diatur nengah sekeda achara lumba nyendiaka midul ti mayuh.
Achara tinju ti deka tembu sehari tu ba Stadium tutup, Kompleks Lumba Sri Aman nyendia 11 midul emas.
Bela nyendia midul iya naya achara lumba basika (lumba ba jalai besai), karate, angkat berat enggau taekwondo. - EDISI UKAS
