ASSAR Meri Dividen 3.0 Sen Seunit, Nguntungka 57,878 Pemeranak Puku
KUCHING: Turu Amanah Saham Sarawak (ASSAR) ngemendarka dividen# interim sepenyampau 3.0 sen seunit ungkup taun belanja naka 30 Jun 2026, mungkur penyampau RM15.24 juta ngagai 57,878 pemeranak puku.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa ngagih kelima kali nya pengudah ASSAR ngaga tusun baru lalu dikira bepelasarka laluh unit ke diempu naka 31 Disember 2025.
“Pengawa ngagih kelima kali pengudah tusun baru tu, sepenyampau RM15.24 juta deka meri penguntung 57,878 pengempu unit ASSAR, dikira bepelasarka laluh unit ke diempu sida naka 31 Disember 2025.
“Reti nya, bisi penatai lebih sepenyampau RM12.95 juta ke nyadi rizab dikena nambah belanja ASSAR ungkup timpuh nangkan nya,” ku iya ba siti program ke diatur ba Kompleks Satria Pertiwi, Hari Lima.
Berebak enggau nya, Datuk Patinggi Abang Zohari madah, tikas pemujur ASSAR terus entap asil strategi ngungkup aset ti nemban sereta ngatur risiko ti proaktif.
Ku iya, ungkup timpuh enam bulan keterubah taun belanja naka 30 Jun 2026, ASSAR meda asil kasar sepenyampau RM19.87 juta.
“Penyampau asil kasar ti diulih ungkup enam bulan keterubah taun belanja naka 30 Jun 2026 iya nya RM19.87 juta, ke alai 42 peratus tauka RM8.34 juta iya nya asil bungai ari sekuriti penatai tetap, lalu 36 peratus tauka RM7.18 juta penguntung ari bejual ekuiti / saham.
“Kelimpah ari nya, 14 peratus tauka RM2.83 juta dividen ari ngempu ekuiti / saham; lalu laluh 8 peratus tauka RM1.52 juta ari bungai ari instrumen makit mata wang enggau penguntung ari nyual sekuriti asil penatai tetap,” ku iya nerang.
Premier Sarawak madah, sekuriti penatai tetap terus nyadi pugu belanja ASSAR, meri asil penatai ti entap sereta ngurang penanggul ari makit saham ti enda tentu.
Iya madah, ngira asil penatai lebih RM12 juta ari taun belanja sebedau tu, penyampau penatai ulih diagih naka 31 Disember 2025 manggai RM28.19 juta.
Sama datai ba pengawa nya, Sapit Premier Sarawak Datuk Amar Douglas Uggah Embas, Datuk Patinggi Tan Sri Leonard Linggi Jugah, Chairman Raban Kompeni Permodalan ASSAR Dato Sri Wahab Dolah enggau pemesai ke bukai.-EDISI UKAS
Pemberita: Nur Nabilla
Gambar: Ibanez Jeffery Guang
