KUCHING: Turu Amanah Saham Sarawak (ASSAR) ngerembai akses servis meranak puku ngagai rayat Sarawak nengah pejalai inisiatif fizikal enggau digital dikena nentuka servis muntang agi diakses serap rayat.

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, raban pengatur ASSAR udah bejalaika sekeda inisiatif nyengkaum kerejasama begulai enggau Service Sarawak dikena nyendiaka kaunter servis ASSAR maya sekeda hari ba Palan Transformasyen Mengeri (UTC) di Sibu enggau Miri, sereta ngerembai servis ngagai Sarikei.

Kelimpah ari nya, iya madah ke ASSAR mega beambi ulih enggau perengka guna Sarawak iya nya Rural Broadband Network (mySRBN) ti disediaka Sarawak Digital Economy Corporation (SDEC) dikena bejalaika servis opis mindah ba kandang menua pesisir.

Ku iya, inisiatif nya bela disukung enggau bantu kerejasama ari opis pelilih tuai genturung pendiau.

“Aku ngarap inisiatif baka tu deka ditandu sereta dikerembai. Kitai deka meda mayuh agi inovasyen meri servis ba Sarawak tu lebih agi ba kandang menua pesisir ngambi inklusif agi, lantang dikena rayat agi sereta efisyen agi,” ku iya.

Iya madah munyi nya ba Program Meri Dividen ASSAR di Kompleks Satria Pertiwi, Hari Lima.

Ngenang pekara bekaul, Datuk Patinggi Tan Sri Abang Zohari madah, pemesai reti digitalisasyen ba ngerembai budaya nyimpan duit sereta meranak puku ba raban rayat, lebih agi ba kandang menua pesisir.

Iya madah, nengah infrastruktur digital ti majak entap, pelasar baka SPay Global ulih dikena nyadi aplikasyen mudah ungkup rayat nyimpan sereta meranak puku nengah ASSAR.

Iya ngelalau rayat Sarawak ngambi terus nyukung produk enggau inisiatif meranak puku ti disedia ASSAR nyadi pengeransing begulai nempa dudi hari ti meruan agi.

Sama datai, Sapit Premier Sarawak Datuk Amar Douglas Uggah Embas, Datuk Patinggi Tan Sri Leonard Linggi Jugah, Chairman Raban Kompeni Permodalan ASSAR Dato Sri Wahab Dolah enggau pemesai ke bukai.-EDISI UKAS

Pemberita: Nur Nabilla
Gambar: Ibanez Jeffery Guang