KUCHING: Pengawa ngidupka lampu baru ba Taman Sahabat kelai penembu renggat kepenudi nyeruri taman nya ngambi tampak enggau manah agi ke pemaik mensia mayuh ti datai kia.

Datuk Bandar Majlis Bandaraya Kuching Selatan, Dato Wee Hong Seng madah, projek nya nyengkaum nyambung tali karan baru sereta ngemanah sistem lampu nyengkaum dekoratif ngambi nyendia endur ti likun agi enggau narit ati.

Ku iya, inisiatif nya seraris enggau komitmen Majlis Bandaraya Kuching Selatan (MBKS) ngambi terus ngemanah perengkaguna mensia mayuh ba semua taman dipegai iya.

“Baka ti disemaya ngagai komuniti, kami deka majak ngemanah fasiliti ba semua taman ba Kuching nentuka endur nya lantang agi ungkup aktiviti belepa,” ku iya.

Iya madah munyi nya lebuh dirandau pemberita lebuh datai ba Pengerami‘Switching On Decorative Lighting 2026’ serimbai Taun Baru China ba Taman Sahabat Kuching kena Hari Lima.

Pengerami nya mega dikemata Sapit Premier Sarawak, Datuk Amar Professor Dr Sim Kui Hian sereta temuai bukai.

Nambah ke nya, Taman Sahabat mega nyadi nalan ngatur Bazar Taun Baru China ti nyendia urung 36 nyentuk 40 bansal enggau bemacham pilih pemakai kreatif.

Ku iya, bazar nya mega ti ketiga diatur MBKS tu pengudah ba Taman Kenyalang seraya siti da deka diatur ba Pending seraya ngerembai pengawa ngatur bazar nya ari siti endur ngagai tiga endur.

Ku iya baru, genap endur bisi pematak kediri empu lalu ulih matak pengusung ti bebida ngambi ngerichahka agi pengerami nya.

Nya alai, mensia mayuh mega diperansang datai pengudah belepa ngambi ngasai pengerichah serimbai Taun Baru China. - EDISI UKAS