LUBOK ANTU: Gaya trek balapan di padang Kompleks Lumba Lubok Antu ti dikelala nyau repuk enggau begunaka perati lengkas nyadi perati ba siti pejalai ngabas ngambi berati ke tikas penyai sereta utai ti patut diseruri ba fasiliti nya.

Sapit Menteri Nembiak, Lumba enggau Pemansang Orang Dagang Sarawak ti mega Chairman Lumba Sarawak (SUKSAR) 2026, Datuk Gerald Rentap Jabu udah ngabas endur nya kena Hari Lima ngambi berati ke trek balapan seraya sukut pengelikun ungkup aktiviti lumba enggau endur atlit belatih.

Ku Datuk Gerald, pengawa nyeruri fasiliti lumba nya dikemerat nentuka pemansang lumba ba renggat baruh ulih dipejalai belama.

Ku iya baru, fasiliti ti bisi kualiti ukai semina nyukung penyulut atlit tang mega meransang rebak biak ngambi bagi ba aktiviti bepengerai.

Iya nyemetak madah ke pengawa nyeruri fasiliti lumba nya nipak juluk Perintah Sarawak negap pemansang nembiak, negap ekosistem lumba nengeri sereta nyendia fasiliti ti meruan ungkup dikena komuniti lokal ba timpuh panjai.

Sama nyempulang pejalai ngabas nya, Kaban Parlimen Lubok Antu Roy Angau, Sapit Residen Bagi Menua Sri Aman Charlie, Pegawai Pelilih Lubok Antu Aloi Ejau enggau Sekretari Politik Premier Sarawak Kua Jack Seng.-EDISI UKAS