SERIAN: Sepenyampau 26 projek nengah Program Transfomasyen Menua Pesisir (RTP) 2026 beungkus RM5 juta udah dikemendar ungkup sitak Kunsil Nengeri (DUN) Bukit Semuja.

Kaban Kunsil Nengeri (ADUN) Bukit Semuja John Ilus madah, projek nya ngaul genturung pendiau, siti taman komuniti sereta institusyen pelajar nyengkaum siti sekula perintah enggau siti sekula peribit.

Ku iya, sebengkah randau udah diatur ba Palan Servis ADUN Bukit Semuja kena Hari Lima ngambi ngempuru semua penerima projek sereta agensi bekaul.

“Randau tu diatur ngambi meri penerang bekaul chara bejalaika projek RTP sereta atur projek ba renggat genturung pendiau.

“Kitai deka penerima iya nya Tuai Genturung Pendiau nerang ngagai peranak bekaul projek ti dikemendar,” ku iya.

John mega madah, ungkup projek RTP sekali tu, sida udah ngerintaika projek begulai enggau agensi teknikal sereta minta raban teknikal ngabas taba projek tumu agi dikena ngelala skop kereja ti diguna.

Ku iya, chara tu deka ngemuntang raban pengatur pengawa, agensi pengatur pengawa enggau teknikal ngambi ngerintaika skop kereja pengudah betemu seraya ngelanchar pejalai projek.

Ku iya, chara nyeraris tumu entara pengari rayat, agensi pengatur enggau penerima projek dipeda nemban agi nentuka isu tanggungpengawa ulih diterang kenyau ari pun taun. - EDISI UKAS