Indu PBB Negap Penyerakup, Nyukung Agenda Pemansang Sarawak
KUCHING: Aum Kaunsil Supreme Indu Parti Pesaka Bumiputera Bersatu (PBB) ti diatur kena Hari Lima ba Bilik Baum, Indu Opis PBB ditu nyadi pelasar besai mekuh pangku pengawa indu dalam landskap politik Sarawak sereta meri sukung rat ngagai tuai Perintah Sarawak.
Aum ti diulu ke Tuai Indu PBB, Dato Sri Fatimah Abdullah, nya mega berandauka pemansang kaban Indu PBB ti majak nambah ninting taun.
Ku iya, naka 5 Februari 2026, kaban Indu PBB ngerikod 181,850 iku, nambah lebih 1,000 kaban dibanding taun nyin tadi seraya nunjukka sukung indu ngagai parti majak tegap.
Ku iya, penyampau kaban Indu PBB ti majak nambah mandangka sada enggau pangku pengawa indu majak beguna kelimpah ngembuan pengelebih, pemintar sereta penau nyadi tuai.
Ngenang pasal penuduk Kunsil Nengeri (DUN) engka ditambah dudi hari, Mandal Tuai Indu PBB, Datuk Sharifah Hasidah Binti Sayeed Aman Ghazali nyemetak madah ke Indu PBB semampai sedia enggau nyukung sebarang pemutus parti ti digaga chara pintar ke pemaik Sarawak.
Nambah ke nya, iya mega andal ke pemintar tuai Premier Sarawak ngadu pemansang nengeri nyengkaum nagih hak Sarawak nengah Sempekat Malaysia 1963 (MA63).
“Nengah iring Premier Sarawak, kitai udah ngemata mayuh pemujur nyengkaum nambah belanja nengeri asil ari pengawa negi hak Sarawak.
“Tu mandangka strategi enggau inisiatif Perintah Sarawak nya engkeman enggau nemban,” ku Dato Sri Fatimah Abdullah.
“Kami enggai Premier bejalai kediri. Kami mansang nyadi siti tim. Sebarang naratif negatif semina deka ngasuh kami tegap enggau seati agi ke pemaik Sarawak,” terang Dato Sri Fatimah.
Berebak enggau nya, iya ngelalau semua pampang enggau pati Indi PBB terus besikap, seati enggau ngembuan disiplin maya bejalaika pangku pengawa parti nentuka Gabungan Parti Sarawak (GPS) menang besai ba Pengawa Bepilih Nengeri (PRN) ke deka datai. — EDISI UKAS
