Zon Selatan Nyulut Ba Achara Tinju SUKSAR IV 2026 Enggau Bulih Lapan Midul Emas
SRI AMAN: Kontinjen Zon Selatan nyulut ba achara tinju Lumba Sarawak (SUKSAR) IV 2026 pengudah bulih lapan midul emas seraya nyadi champion achara nya.
Pekit kepenudi ti diatur ba Stadium Betutup, Kompleks Lumba Sri Aman, kena Hari Lima ngemata pekit entara pentinju ari Zon Selatan, Zon Barat, Zon Utara enggau Zon Tengah.
Pengawa nyua midul udah dipenyadi Sapit Menteri Nembiak, Lumba enggau Pemansang Orang Dagang Sarawak ti mega Chairman SUKSAR IV 2026 Datuk Gerald Rentap Jabu begulai enggau Residen Bagi Menua Sri Aman Mahra Salleh.
Bisi 11 kategori midul emas dipekit ngaul achara lelaki enggau indu seraya mandangka semangat bebendar bepekit.
Ba kategori Flyweight 51 kilogram lelaki, midul emas dipenggi Azriq Syakirin Azfarizan ari Zon Selatan, dientudi Romero Agan ari Zon Utara bulih midul pirak, seraya dua midul engkeraju diempu Mark Alanson Sepun Jony ari Zon Tengah enggau Nelson Nankai ari Zon Barat.
Kategori Bantamweight 54 kilogram lelaki ngemata Mohd Zulkarnain Iswandy (Zon Barat) bulih midul emas, ditangkan Hyson Chrisley Sedie (Zon Utara) bulih midul pirak enggau midul engkeraju diempu Mohd Shahrizal Abu Saman (Zon Selatan) enggau Roulaz Alanson Richard (Zon Tengah).
Kategori Lightweight 60 kilogram lelaki diempu Wayne Kho Hae Kai (Zon Tengah), dientudi Davis Beckham Mit (Zon Selatan) bulih midul pirak, seraya midul engkeraju bela diempu Oliver Ngu Tian Lok (Zon Utara) enggau Jackson Daniel Dom (Zon Barat).
Seraya ba kategori Light Welterweight 63.5 kilogram lelaki, midul emas diempu Lam Wee Liang (Zon Selatan), midul pirak dipenggi Maurice Malcon Uging (Zon Barat), seraya midul engkeraju diempu Joshua Hii Wei Jun (Zon Utara) enggau Awg Muhd Arfan Awg Ismail (Zon Tengah).
Kategori Welterweight 67 kilogram lelaki ngemata Abraham Samuel Jerry (Zon Selatan) bulih midul emas, Alexander Xavier Andres (Zon Tengah) bulih midul pirak lalu midul engkeraju bela diempu Mcdicklas Laja Sigan (Zon Utara) enggau Feinsten Fabrian Dominic (Zon Barat).
Ba kategori Light Middleweight 71 kilogram lelaki, Ryan Fabiano Maiklay (Zon Selatan) nyadi champion, dientudi Riq Roland (Zon Tengah) ti bulih midul pirak enggau midul engkeraju diempu Marcos Robert (Zon Utara) enggau Tristan Aeden Minggu (Zon Barat).
Kategori Middleweight 75 kilogram lelaki mega ngemata Brandon Amir (Zon Utara) bulih midul emas, Ilham Zhafran Al Ghanim (Zon Barat) bulih midul pirak seraya midul engkeraju dipenggi Syahrul Wafie Khan Amran Khan (Zon Selatan).
Ba kategori indu, kategori Minimumweight 48 kilogram ngemata Patricia Jaquilina Bruce (Zon Selatan) bulih midul emas lalu Felhzcha Emelda Eiin Linda (Zon Barat) bulih midul pirak seraya midul engkeraju bela dipenggi Jessie Wong (Zon Utara) enggau Frenecia Frander (Zon Tengah).
Nambah ke nya, ba kategori Flyweight 52 kilogram indu, Lailatul Aini Sapian (Zon Selatan) dipadu nyadi champion lalu Dayang Faiqah Awg Abu (Zon Barat) bulih midul pirak sereta midul engkeraju diempu Monica Luhong John (Zon Utara) enggau Merdeka Tingang (Zon Tengah).
