KUCHING: Gabungan Parti Sarawak (GPS) deka ngatur konvensyen kena 19 April tu ba Palan Konvensyen Borneo Kuching (BCCK).
Sekretari Besai GPS Dato Sri Alexander Nanta Linggi madah, konvensyen keterubah kenyau ari GPS ditumbuh ba taun 2019 nya deka meri perati ngagai pemujur Strategi Pemansang Pengudah COVID-19 (PCDS) 2030.
“Pengari ari empat parti komponen GPS deka dikangau ngulu konvensyen nya, tang penyampau pengari apin ditetapka,” ku iya.
Iya madah munyi nya ba aum pemberita pengudah Aum Supreme Kaunsil GPS di Indu Opis Parti Pesaka Bumiputera Bersatu (PBB) Sarawak kena Hari Enam.
Aum nya udah diulu ke Premier Sarawak merangkap Pengerusi GPS Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
Dato Sri Alexander mega madah, siti komiti besai deka ditumbuh nentuka konvensyen nya lanchar ti deka diulu ke Sapit Premier Sarawak, Datuk Amar Douglas Uggah Embas.
Ku iya, pangku pengawa sapit chairman komiti nya deka dipegai presiden parti komponen GPS iaitu Parti Rakyat Sarawak (PRS), Parti Demokratik Progresif (PDP) enggau Parti Sa’ati Rayat Sarawak (SUPP).
Sama datai ba aum nya, dua Sapit Premier Sarawak Datuk Amar Douglas Uggah Embas enggau Datuk Amar Profesor Dr. Sim Kui Hian.-EDISI UKAS
