Sapit Menteri Pelajar, Inovasyen enggau Pemansang Penau Sarawak Datuk Francis Harden Hollis madah, pengawa ngasi ke atur malin nya beguna amat nentuka institusyen KMKK ulih diadu manah, lurus enggau bisi integriti.
"KMKK meseti ngatur aum enggau aktiviti ti ulih meri pemaik ngagai komuniti seraya nyendia ripot nyadi bukti betulis ngagai raban Opis Pelilih.
“Sida mega meseti nerang ke pengawa ngena belanja ngagai agensi perintah enggau komuniti nyadi bukti pengelurus enggau integriti KMKK ba sitak sida,” ku iya.
Iya madah munyi nya lebuh bejadi Pengawa Nyua Setipikit Tuai Komuniti enggau Tuai Raban Bansa ungkup sitak Kunsil Nengeri (DUN) Simanggang, ditu kena Hari Lima.
Datuk Francis ti mega Kaban Kunsil Nengeri (ADUN) Simanggang nya nyemetak madah ke pemesai guna institusyen KMKK nyadi jematan entara Perintah Sarawak enggau komuniti ba renggat baruh.
“Perintah Sarawak chukup begunaka penatai KMKK ngerembai polisi pemansang ti dipeda ulih nyungkak atur pemansang komuniti ba nengeri tu.
“Nya kebuah, aku ngarap KMKK ulih ngesan pangku pengawa sida enggau manah ungkup komuniti dikena ngemujur pemansnag nengeri tu dipegai Perintah Sarawak,” ku iya.
Dulu ari nya, pengawa ti diatur ba Palan Servis DUN Simanggang nya ngemata empat Tuai Komuniti enggau 39 Tuai Raban Bansa nampung pengawa sereta nyiri empat Tuai Raban Bansa baru enggau siku waris Tuai Raban Bansa mega nerima setipikit ngenang jasa.
Sama datai iya nya Pegawai Pelilih Sri Aman, Shariff Bujang, Temenggong Leonard Libau Anol, Pemancha Lee Shiang Hua, bala pengari Opis Residen Bagi Menua Sri Aman enggau staf Opis Pelilih Sri Aman. - EDISI UKAS
