LUNDU: Pengawa ngagihka belanja Unit Pekara Pengarap Bukai (UNIFOR) penyampau RM250,000 dikeandal ulih nentuka pengawa ngaga Gerija St Cosmas di Kampung Pasir Tengah tembu seraya meri pemaik ngagai peranak dia.

Kaban Kunsil Nengeri (ADUN) Opar, Billy Sujang bejadi pengawa nyua chek nya ngagai raban gerija kena Hari Lima ngaul renggat kedua ngaga rumah sembiang nya.

Ku Billy Sujang, agih belanja nya ukai semina dikena ngerumban pengawa nembu ke begunan gerija, tang mega nentuka perengkaguna nya ulih dikena raban Kristian di Kampung Pasir Tengah nyadi palan besembiang enggau aktiviti ngaul komuniti.

“Aku ngarap pengawa ngagihka belanja nya ulih nyaup nembu ke pengawa ngaga Gerija St Cosmas seraya meri pengelantang sereta pemaik timpuh panjai ngagai peranak ditu,” ku iya.

Iya mega madah ke pengeran nyaup nangkup sebarang agih belanja ti enda chukup nyema diguna nengah agih belanja Program Transfomasyen Menua Pesisir (RTP) tauka Geran Projek Mit Pemansang Menua Pesisir (MRP).

Nangkan nya, Chairman Gerija St Cosmas, Peter Bojeng meri terima kasih ngagai Billy Sujang laban ransing nyaup raban gerija ngulihka agih belanja UNIFOR ti besai reti dikena ngemujur pengawa ngaga gerija nya pengudah napi mayuh pemar sebedau tu.

Pengawa nya mega digulu Pemancha Allen Manium Enggang, Penghulu Kutong Enggang, Tuai Raban Bansa Kampung Pasir Tengah, David Merson sereta Chairman KGK Gerija St Cosmas enggau kaban komiti. — EDISI UKAS