KUCHING: Program Heart Health 2026 diatur Yayasan Tungkul Atau Sarawak terus nyadi pelasar besai narak pengeleda ngagai mensia mayuh bekaul penyakit tungkul atau enggau mati tubuh sepiak, seraya narak gaya idup bepengerai entara rayat Sarawak.

Program bepelasarka komuniti tu nyengkaum beperesa pengerai pechuma, licha, seminar sereta aktiviti promosyen pengerai ti diatur enggau kerejasama Palan Tungkul Atau Sarawak (PJS) hospital ba selampur Sarawak sereta bemacham agensi enggau organisasyen bekaul.

Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal, Datuk Amar Dr Sim Kui Hian madah, taja Sarawak ngembuan fasiliti ngubat tungkul atau tikas antarabansa tang pengawa nagang meseti dikemerat dikena nagang kes penyakit tungkul atau nambah.

“Kitai temegah laban Palan Tungkul Atau Sarawak nya palan tungkul atau keterubah nengah Opis Menteri Pengerai Malaysia ti mega dirintai dalam 100 palan tungkul atau pemadu manah ba rantau Asia Pasifik.

“Tang, nyema pengawa nagang ulih ditegap, penyampau pesakit deka terus nambah,” ku iya ba pengerami nya, kena Hari Enam.

Iya nyemetak madah ke Yayasan Tungkul Atau Sarawak kenyau ari ditumbuh ujung 1980-an udah ngesan pangku pengawa besai ba pemansang servis kardiologi di nengeri tu, nyengkaum nyendia kereban perubat, ngemanah fasiliti sereta ngerembai akses ngubat tungkul atau ke Bintulu enggau Sibu.

Ku iya, pengeleda mensia mayuh nya komponen pemadu beguna nentuka rayat Sarawak semampai gerai lalu enda bepanggai ngagai ubat sepital.

“Kitai ukai semina deka numbuh hospital enggau ngubat pesakit, tang mega deka meda rayat Sarawak semampai gerai enggau ngasai kualiti idup ti menyana agi,” ku iya.

Program Heart Health 2026 mega nerima sukung rat mayuh raban nyengkaum Majlis Perbandaran Padawan nyadi penyedia venue, Palan Tungkul Atau Sarawak ti ngadu pengawa beperesa pengerai enggau fisioterapi, Gerempung Anak Bulan Mirah Malaysia Pampang Kuching ti ngatur demonstrasyen resusitasi kardiopulmonari (CPR) sereta ngena defibrilator automatik luaran (AED), kelimpah Palan Perubat Borneo ti ngadu aktiviti meri darah.

Kelimpah beperesa pengerai, program tu mega richah enggau aktiviti senamrobik, tanda enggau pemerindang muzik ari sekula sereta gerempung komuniti lokal nyadi peransang ngemeran gaya idup bepengerai.

Program tu nipak juluk Perintah Sarawak nempa komuniti ti gerai, beretan enggau bepenemu, seraya nyukung agenda pemansang nengeri nuju Sarawak Maju enggau Lantang manggai 2030. - EDISI UKAS

Pemberita : Lonney Jinab Doris
Gambar : Lonney Jinab Doris