KUCHING: Sarawak terus bejalaika inisiatif strategik mai nengeri tu ngenap ekosistem ekosistem semikonduktor nasional Malaysia enggau meri perati ngagai integrasyen rentayan berega, pemansang modal mensia sereta pengawa nyeraris ti rat agi enggau ngemerat industri Perintah Besai.

Pekara nya dibantai nengah sebengkah randau entara Opis Menteri Dagang Antarabansa, Industri enggau Pengawa Meranak Puku (MINTRED) Sarawak enggau Collaborative Research in Engineering, Science & Technology (CREST) dikena nyerungkai peluang kerejasama dalam sektor kuasa karan enggau elektronik (E&E) sereta semikonduktor.

Randau nya ngempuru tuai industri kanan enggau tokoh industri bepeneleba ari landskap semikonduktor Malaysia, kelimpah dipasuk pengari Kaunsil Pemansang Pengawa Meranak Puku Malaysia (MIDA) enggau Kaunsil Pemansang Ekonomi Digital Malaysia (MDEC) lalu mandangka pengawa nyeraris entara Perintah Besai enggau Perintah Nengeri entap nyungkak agenda semikonduktor menua.
Sapit Menteri MINTRED Sarawak, Datuk Dr Malcolm Mussen Lamoh madah, inisiatif Sarawak nya ngenap pengelebih ti dikemisi ba menua tu lalu ukai besemekih enggau hab industri ti udah mansang.

“Kerejasama baka tu ulih negap pengelebih rentayan bekal nasional seraya nyukung pemansang kandang menua ti sebela agi,” ku iya seraya madah ke Sarawak bisi pengulih nyukung ekosistem semikonduktor Pulau Pinang nengah aktiviti kilang berega ti beselinting.

Randau ti diatur InvestSarawak enggau diulu ke Tuai Pegawai Eksekutifnya Timothy Ong mega berati ke pengawa nempa jematan strategik entara kluster semikonduktor Pulau Pinang ti udah tegap enggau industri Sarawak ti benung mansang kelebih agi mindahka segmen bekaul rentayan berega nuju aktiviti ti bepelasarka teknologi.

Deligit CREST diulu ke Tuai Pegawai Eksekutif Jaffri Ibrahim lalu digulu Chairman Clarion Group Tan Teong Khin, Penyanding Penemu Eksekutif Datuk Seri Jebasingam Issace John sereta ex-Direktor Kaunsil Ang Hee Lai.

Clarion Group ti ngambi bagi mega madah ke randau nya ti disungkak industri enggau bepelasarka atur pengawa seraya mandangka minat sektor peribit ti tegap ngagai kuing tuju industri semikonduktor Sarawak.

Pemansang modal mensia mega dikelala nyadi pekara dikemerat enggau kededua raban berati ke inisiatif bepuguka industri dikena ngemansang pengereja landik enggau sedia ungkup makit kereja ba Sarawak, nyengkaum ba bidang langkar tengkebang litar begulai, kilang pemadu maju enggau atur teknologi tinggi.

Inisiatif nya seraris enggau Pelin Kuing Tuju Semikonduktor Sarawak 2030 sereta Strategi Pemansang Pengudah COVID-19 (PCDS) 2030, seraya negap inisiatif Sarawak ngambi ngemansang ekosistem semikonduktor enggau E&E Malaysia seraya nyukung ekonomi tegap timpuh panjai. - EDISI UKAS