Kaban Kunsil Nengeri (ADUN) Opar, Billy Sujang madah, tuai ba renggat genturung pendiau ngesan pangku pengawa besai nyadi penyambung entara rayat enggau perintah lalu nentuka genap perambu sereta pejalai pemansang ulih diagih nemban agi ngagai komuniti.

“Kerejasama rat entara Tuai Raban Bansa, Kaban (AJK) Komiti Pemansang enggau Pengelikun Genturung Pendiau (JKKK) enggau pengari rayat beguna amat nentuka genap inisiatif pemansang ulih dipejalai berurun sereta meri pemaik terus ngagai peranak lokal,” ku iya.

Iya madah munyi ba Pengerami Apresiasyen AJK JKKK Kampung Jugan ungkup sesyen 2024–2025, ditu kena Hari Enam.

Ku Billy, mayuh projek pemansang udah enggau benung dipejalai ba Kampung Jugan nengah agih belanja Program Transfomasyen Menua Pesisir (RTP) enggau Greater Kuching Coordinated Development Agency (GKCDA).

Iya mega meri terima kasih ngagai Perintah Sarawak nengah belanja ti diagih kelebih agi nengah GKCDA ti nentuka mayuh projek pemansang ke pengelantang rayat ba sitak DUN Opar.

Sama datai, Pegawai Pelilih Bau Eddy Nayoi enggau Tuai Raban Bansa Kampung Jugan Ponisa Nyuyam.-EDISI UKAS