DEBAK: Veteran Raban Soldadu Malaysia (ATM) dipinta terus bejalaika pengawa nyaga pengelantang enggau penyerakup komuniti, seraris enggau juluk pemansang komuniti ti inklusif enggau lantang.
Sapit Menteri Pengelantang Komuniti Sarawak, Datuk Mohammad Razi Sitam madah, komitmen meruan PVATM nyadi siti gerempung ukai dikuasa perintah ti ransing ngatur program ngaul komuniti seraya nyungkak pemansang sosial ba renggat baruh.
“Kerejasama veteran ATM dalam aktiviti komuniti beguna amat dikena nempa pengelantang enggau bela bebasa ke pangan diri ba genap endur.
“Aku ngelalau semua raban gerempung ransing gawa sereta bekerejasama enggau mayuh agensi dikena ngemujur program ti meri empas positif ngagai rayat,” ku iya.
Iya ti mega Kaban Kunsil Nengeri (ADUN) Saribas lebuh bejadi Aum Besai Ninting Taun 2026 Gerempung Veteran Raban Soldadu Malaysia (PVATM) Pampang Betong/Saratok/Kabong di Dewan Millennia, Debak, kena Hari Enam.
Iya nyemetak madah, peneleba sereta disiplin ti dikembuan raban veteran nyadi aset berega dikena mekuh penyerakup enggau nempa komuniti ti idup lantang.
Berebak enggau nya, iya mega mai PVATM ngatur program khas serimbai Hari Sarawak ba Pelilih Mit Debak nyadi pelasar mekuh kaul entara veteran enggau komuniti dia.
Kelai sukung, iya mega nyuaka pemeri RM10,000 dikena nyaup ngatur aktiviti gerempung.
Nangkan nya, Kaban Parlimen Betong, Dato’ Dr. Richard Rapu @ Aman Begri ngelalau orang pinchin soldadu ngambi terus ngemansang menua nengah pengeransing gerempung ngaul diri ba aktiviti komuniti.
Iya nyemetak madah ke Perintah Besai semampai komited nyaga pengelantang sereta guna raban soldadu kelebih agi raban veteran nentuka pengelantang sida terus dijaga.
Kelai sukung ngagai pangku pengawa PVATM, iya mega nyuaka pemeri RM5,000 dikena nyaup ngemujur aktiviti ti dilanggur gerempung nya. — EDISI UKAS
