ENGKILILI: Pasar Engkilili richah agi pengudah dipanchar lampu pengias serimbai pengerami ngintu Taun Baru China nengah ngatur program“Light Up Engkilili In Conjunction With Chinese New Year Celebration 2026” kena Hari Lima.

Pengawa bejadi program diatur Kaunsil Pelilih Lubok Antu (MDLA) nya udah dipenyadi Kaban Parlimen Lubok Antu, Roy Angau Gingkoi ti diatur ba panggau semak Dataran Rusa, Engkilili, seraya ngerichah malam enggau matak penatai komuniti dia.

Pengawa ngatur program tu dikena ngerichah pengerami seraya ngerapit kaul penyerakup enggau pengelantang dalam komuniti pupu bansa ba pelilih Engkilili.

Inisiatif nya mandangka komitmen raban bekuasa lokal ngerichah aktiviti ngaul komuniti sereta ngangkatka Engkilili nyadi pasar ti richah enggau inklusif agi.

Sama datai, Sekretari Politik Premier Sarawak Kua Jack Seng, Pegawai Pelilih Lubok Antu ti mega Chairman Kaunsil Pelilih Lubok Antu (MDLA) Akoi Ejau, Sekretari MDLA Ting Tiew Lik, sereta Kaban MDLA.-EDISI UKAS