SIMANGGANG: Kontinjen Sarawak meseti ngatur manah tim, operasyen sereta logistik ba misyen nya dikena ngetan gelar champion ba Lumba Malaysia (SUKMA) Ke-22 2026 di Selangor, Ogos tu.

Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah nyemetak madah, pemar nganti kontinjen Sarawak di Selangor berindik ari inisiatif tuai rumah ti ngatur lumba ba semilan pelilih dalam nengeri nyengkaum siti lumba ba Negeri Sembilan.

Ku iya, strategi nya mega melara bala atlit Sarawak sepanjai lumba nya ila seraya begunaka disiplin sereta fokus ari bala atlit.

“Ba SUKMA tu, engka ari sukut logistik berasai berat ungkup nengeri baka Sarawak, kitai enda ulih ba siti endur, semua nya deka ngachir ba semilan pelilih ba Selangor.

“Tu begunaka kontinjen ti nyaga tetiap lumba ba pelilih nya, ngari ke Sarawak beguna runding ti entap, meseti nemu atur pengawa lalu atlit meseti bepenau taja nadai begulai dalam siti kem, sida meseti ulih bebendar bepadan,” ku iya.

Iya madah munyi nya ba jaku pengelalu Pengawa Nangguh Lumba Sarawak (SUKSAR) IV 2026 di Stadium Betutup, Kompleks Lumba Sri Aman kena Hari Minggu.

Pengawa nangguh nya udah dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Iya ti mega Penyanding Penemu Komiti Pengatur SUKSAR IV 2026 mega madah, pengawa besikap tumu nyadi kunchi nentuka atlit Sarawak meri perati ngagai pemujur pekit.

Ngenang pengawa ngatur SUKSAR, iya madah ke lumba dua taun sekali nya ukai semina dikena ngansah penau atlit biak tang mega nyadi pelasar negap penyerakup, semangat belumba sereta kerejasama entara kontinjen ari selampur Sarawak.

”Tambah mega, pemujur ngatur lumba baka tu bukti komitmen perintah nengeri ngemansang ekosistem lumba ti berurun enggau besemekih agi,” ku iya.

Nya kebuah, iya ngelalau semua atlit netapka pekit tu nyadi singkang ngagai renggat tinggi agi nyengkaum ngari ke Sarawak enggau menua ba panggau nasional enggau antarabansa dudi hari.

Sama datai, Sapit Menteri Nembiak, Lumba enggau Pemansang Orang Dagang Sarawak Dato Gerald Rentap Jabu, Sapit Menteri Dagang Antarabansa, Industri enggau Pengawa Meranak Puku Sarawak Datuk Dr Malcolm Mussen Lamoh, Sapit Menteri Pelajar, Inovasyen enggau Pemansang Penau Datuk Francis Harden Hollis, Tuai Sekretari Politik Premier Sarawak Dato Fazzrudin Abdul Rahman sereta temuai dipebasa bukai. - EDISI UKAS