MATU: Pengeransing Perintah Sarawak ngenegap pemansang menua pesisir diayanka nengah pengawa ngabas taba projek sereta program penerang bekaul pemujur pemansang nengah Kaunsil Pemansang enggau Pengintu Tanah (LCDA) di Pelilih Matu enggau Pelilih Mit Igan.

Pengawa ngabas taba kena Hari Minggu nya betuaika Sapit Menteri ba Opis Premier Sarawak (Integriti enggau Ombudsman) ti mega Kaban Kunsil Nengeri (ADUN) Jemoreng, Datuk Dr Juanda Jaya dikena meresa status pemadu baru sekeda projek pemansang strategik ti benung digaga.

Ba program penerang ti dikenatai Chairman Bagi Pekara Ngaga enggau Injiniring Kaunsil Pemansang Ekonomi Sarawak, Joehari Iskandar Effendi madah, pengawa beratika pemansang Medan Selera sebagi ari pelin pemansang Mengeri Baru Matu.

Nitih ku iya, pemansang nya bela nyerangkung pengawa ngaga kedai, makit sereta kotej industri ti ngembuan tuju dikena meransang aktiviti ekonomi menua, nambah manah perengka guna mensia mayuh sereta nyendiaka infrastruktur ti berurun agi ungkup peranak menua.

Ku iya, Medan Selera nya mega disadang berengkah dikena nangkan ngintu Hari Raya Aidilfitri taun tu.

Pengawa ngabas nya mega disempulang pengari Opis Pelilih Matu, Opis Pelilih Matu Daro, Sarawak Energy Berhad sereta pegawai LCDA dikena nentuka pejalai projek mujur digaga nitih perambu.

Maya nya mega, Datuk Dr Juanda bela ngabas pemansang Projek Palan Servis Igan di Pelilih Mit Igan.

Penerang madahka pengawa meresi taba enggau tanah udah tembu kena Disember 2025 dikena besikap ke tikas ngaga nangkan nya.

Langgur pemansang ba Palan Servis Igan nyerangkung pengawa ngaga stesyen minyak, medan selera, tamu, rumah kedai mit dua ringkat sereta rumah kedai dua ringkat ti disadang ulih ngenyakkahka aktiviti ekonomi menua kelimpah nyendiaka perengka guna ti sistematik agi ungkup peranak menua enggau mensia mayuh ke datai.

Dua iti projek pemansang tu dipelaba nyungkak pemansang sosioekonomi Pelilih Matu enggau Igan, seriris enggau agenda pemansang Sarawak ti inklusif, sebela sereta bepelasarka rayat.- EDISI UKAS