Pengawa Ngatur Tanah Strategik Pugu Pemansang Meruan Sarawak
BINTULU: Pengawa ngatur tanah ti strategik, lurus enggau bepelasarka teknologi nyadi pugu nentu pemansang Sarawak mengkang meruan, inklusif sereta tan napi pemar dudi hari.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, tanah ukai semina reta fizikal, tang pesaka, penatai pemisi sereta lambang identiti rayat ti nyadi pugu pemansang ekonomi enggau pengelantang rama nengeri tu.
Nitih ku iya, pengawa ngatur tanah patut dipeda nyadi strategi pemansang timpuh panjai ti nentuka kuing tuju ekonomi, rama enggau pemeruan rampa menua Sarawak.
“Ba pengawa kitai napi pemansang deras enggau ubah global, kitai napi pemar ti majak kompleks nyengkaum isu Tanah Adat Bumiputera (NCR), urbanisasi, ubah klimet sereta penanggul rampa menua.
“Chara kitai meseti sebela entara pemansang enggau rama ngambi pemansang enda ninggalka rayat sereta enda ngemunas pesaka aki ini kitai,” ku iya.
Iya madah munyi nya maya bejaku ba Program Landas Summit 2026 ditu, Hari Satu.
Premier Sarawak madahka perintah nengeri ransing ngerumban pengawa nyukat tanah NCR, dokumentasyen, nyungkak pengelurus sereta nentuka penyarut diputar enggau mujur.
Berebak enggau nya, iyta bela nerang pemesai reti perambu tanah ti sistematik sereta begempung dikena mutar penanggul pemansang mengeri, peminta pengawa berumah sereta guna komersial ti enda ngeruga pengelantang rayat enggau pemeruan rampa menua.
Iya mega nyebut bekaul penanggul ubah klimet baka bah, tanah tusur enggau gaya hari ti enda tentu ti begunaka perambu tanah bepelasarka pengetan klimet sereta nyaga kandang menua.
Premier Sarawak madah, perintah nengeri nyerungkai macham pun penatai kuasa baru nyengkaum hidrogen, hidro, biojisim enggau solar nyadi sebagi ari strategi ekonomi gadung, kelimpah beambi ulih enggau teknologi Artificial Intelligence (AI), digitalisasyen data sereta pemansang satelit nano dikena nyaup perambu enggau kar tanah ti betul agi.
Ku iya, transformasyen digital ba pengawa ngatur tanah ukai nyilih pengawa pegawai, tang ngenegap penyikar sistem nengah pengawa bekenaka GIS, peminta ba tali arus, bekunsi data entara agensi sereta ngemerat pengelikun data.
Maya nya mega, iya bejadika Pelin Strategik Opis Tanah enggau Survei Sarawak 2026–2030 ti dilangkar seriris enggau Strategi Pemansang Pengudah COVID-19 2030 (PCDS 2030).
Pelin nya nyerangkung lima pugu strategik, 26 strategi enggau 104 inisiatif mungkur atur tanah, undang-undang, ngatur projek, teknologi digital sereta pemansang kapasiti organisasyen.
Kelimpah ari nya, Premier Sarawak mega bejadika Balai Premier Sarawak di Fakulti Alam Bina dan Ukur, Universiti Teknologi Malaysia nengah chara ‘online’ nyadi basa ke sukung Perintah Sarawak ba pengawa ngenegap pansik enggau pemansang, nyengkaum kerejasama makmal satelit begulai enggau Opis Tanah enggau Survei Sarawak. -EDISI UKAS
