SRI AMAN: Perintah Sarawak semampai ransing ngadaka modal mensia betikas tinggi dikena nyukung program pemansang nengeri enggau menua dudi hari.

Sapit Menteri Pelajar, Inovasyen enggau Pemansang Penau Sarawak Datuk Francis Harden Hollis madah, sebagi ari inisiatif perintah tu nyengkaum Peresa Dual Language Programme Sarawak (UP-DLP) ungkup nembiak primari.

Ku iya, UP-DLP dikena nisih pengulih nembiak lebih agi ba pelajar Jaku Inggeris ti diatur ketegal Ujian Penilaian Sekolah Rendah (UPSR) enggau Penilaian Menengah Rendah (PMR) nadai agi.

"Tu dikena perintah nengeri nyidi pengelemi enggau pengurang lalu nangkan nya digagaka intervensi ke engkeman dikena mutar penanggul nya," ku iya.

Iya bejaku munyi nya maya Program Pemansang Komuniti ke diatur Opis Pelilih Sri Aman di Rumah Reggie Beria, San Kemantan, Undop ditu, empai lama tu tadi.

Iya ke mega Kaban Kunsil Nengeri (ADUN) Simanggang madah, pengeransing nempa modal mensia bela disaup macham inisiatif bukai baka Skim Pelajar Tinggi Pechuma Sarawak (FTES), baucar bup, Skim Laptop Pechuma, Skim Graduate Pulai Ke Sarawak (GPS) enggau Bantu Khas Nembiak Sarawak sereta mayuh ke bukai.

Ku iya, di Simanggang, perintah udah numbuh Sarawak Skills ti nyendiaka macham kus engkeman dikena nipak peminta gawa maya tu.

Iya enggau nya ngarap rayat Sarawak semampai meri sukung ngagai pegai Perintah Sarawak betuaika Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngambika semua program pemansang ulih dipejalaika enggau mujur. -EDISI UKAS