Perintah Nyaup Indu Ba Pengawa Dagang & Ekonomi Kreatif
KUCHING: Inisiatif komprehensif ti ngempung pengawa nyaga pesaka, pemansang kapasiti enggau dagang indu dipeda tau nempa raban indu ngatika diri sereta puh ba pekara ekonomi.
Menteri Pemansang Indu, Ruang Bilik enggau Komuniti, Dato’ Sri Nancy Shukri madah, perintah majak ransing ngenegap raban indu ti ulih ngatika diri sereta ngasil penatai pemisi diri empu, setipak enggau pengeransing ngenegap pengelantang ruang bilik sereta nyaup pemansang ekonomi menua.
Nitih ku iya, program PERANTIS enggau Pemandang Dayung Pesaka siti inisiatif iring tuai pesaka enggau pemansang kapasiti ti negap indu ba pengawa mansik, ngadu dokumentasyen sereta bejuraika pesaka budaya Sarawak.
"Sebagi ari inisiatif ti dipejalai nyengkaum meri puku mit sereta nyendia pelasar sukung baka indu dinamik, dikena mantu indu ngemujurka pengulih ekonomi nengah chara ti meruan.
“Nyadi Menteri Pemansang Ruang Bilik, kitai patut nentuka indu ulih ngatika diri. Nengah sukung ti engkeman, kitai meri peluang ngagai sida ngasil penatai pemisi diri,” ku iya maya Pengawa Nutup Program PERANTIS enggau Pemandang Dayung Pesaka, ditu, Hari Satu.
Dato’ Sri Nancy mega madah, Sarawak ngembuan pengelebih diri empu nengah macham budaya sereta penyelai produk menua, lebih agi ba bidang seni kreatif enggau krafjari, ti nyadi penatai pemisi raban indu.
“Budaya enggau produk Sarawak nyelai. Nengah penyelai tu, raban indu ukai semina ulih mantu nambah penatai pemisi ruang bilik, tang ulih nyaup ekonomi nengeri enggau menua,” ku iya madah baru.
Program nya bela dirichah enggau penatai Sekretari Mendam Opis Menteri Dagang Temuai, Industri Kreatif enggau Seni Pemerindang Sarawak, Morshidi Fredrick, Kaban Komiti Indu Opis Pemansang Indu, Datu Angelina Celestine Ujang, Datu Dr Rashidah Bolhassan sereta Direktor Program Dayung Warisan, Steffany Raymond Landong. –EDISI UKAS
