MUKAH: Tiap bengkah agensi patut bekerejasama enggau Unit Komunikasi Awam Sarawak (UKAS) nyaup nabur penerang ari sida.
Direktor UKAS Awang Putrayusrie Awang Redzuan madah, kerejasama nya tau bendar mantu ngengataika penerang nyentuk ke menua.
"UKAS nabur penerang bekaul polisi enggau inisiatif perintah ngagai rayat lebih agi ba nengeri kitai.
"Kitai mega nemu mayuh inisiatif digaga Perintah Sarawak ke dipegai Datuk Patinggi Tan Sri (Dr) Abang Abdul Rahman Zohari Tun Datuk Abang Openg lalu pekara nya patut dipadah ngagai semua renggat rayat,” ku iya.
Iya madah munyi nya maya bejadika Program Nutup UKAS Making Connection 2026: Woksyop Nulis Berita, Artikel enggau Nabur Media ungkup Pegawai Kaul Mensia Mayuh (PRO) ditu, Hari Dua.
Iya mega madah UKAS siti unit ti besai amat reti ari baruh Opis Premier Sarawak.
Iya mega ngarap program nya meri pemaik ngagai penyereta ke bisi datai.
Ke penemu mayuh, tuju program tu dikena nambah pengulih pegawai perintah ngelangkar komunikasyen betulis ti strategik ungkup tuju kaul mensia mayuh, lebih agi ba pekara polisi perintah, penanggul komunikasyen enggau kaul media.
Kelimpah ari nya, woksyop nya mega nentuka pegawai ulih ngasilka berita ti mandangka sada perintah, mutar komunikasyen mensia mayuh maya bisi penanggul sereta belajar ngarang ngena jaku ti efektif sereta engkeman.
Sama datai, Pegawai Tadbir Khas UKAS Datu Takun Sunggah, Sapit Direktor UKAS Mohamed Faizal Shah Ali, Tuai Penulung Direktor UKAS Anwar Hanafi Ardimansyah enggau Ahmad Faizal Osman (Cikgu Emmet). - EDISI UKAS
