BINTANGOR: Perintah Sarawak ngemerat pengelikun enggau pemeresi sungai ungkup guna komuniti ti bepanggai enggau pengangkut sungai lebih agi orang dagang bot sereta peranak menua.

Menteri Pengangkut Sarawak, Dato Sri Lee Kim Shin madah, sungai ukai semina beguna ke ditengah, tang mega nyadi pugu nyaup aktiviti ekonomi enggau pengidup besehari komuniti, lebih agi ba kandang tebing enggau menua ulu sungai.

“Nengah kimpin tu, kitai deka nambah pengeleda mensia mayuh senentang pemesai reti nyaga pengelikun sungai, nitih atur navigasyen sereta tanggungpengawa begulai nentuka sungai kitai semampai beresi, likun sereta dijaga.

“Kerejasama semua raban besai amat reti dikena nyeliah penusah, ngintu infrastruktur sungai enggau nyaga rampa menua ungkup rebak deka datai,” ku iya.

Iya madah munyi nya ba Kimpin Pengelikun enggau Pemeresi Sungai sereta Program Nyua Projek Replacement of Existing Pontoons and Other Associated Works at R.C. Pontoon Wharf, Main Bazaar, ditu, Hari Dua.

Ku iya, projek nyeleti Jelatung R.C. Pontoon Main Bazaar ukai semina ngenapka kimpin pengelikun, tang meri peneleba ti likun agi, lantang sereta muntang ditengah orang dagang bot, orang ke nepan bot enggau komuniti menua.

Nitih ku iya, projek beungkus RM3,040,357 nya digaga Sarawak Rivers Board (SRB) ari baruh atur Opis Menteri Pengangkut Sarawak (MOTS), belabuh 6 November 2024 lalu tembu kena 19 Disember 2025.

Dato Sri Lee meri terima kasih ngagai Sarawak Rivers Board, raban projek enggau kontraktor ke pengeransing sereta kerejasama ba nentuka projek nya mujur digaga sereta nitih langgur.

“Enti projek tu udah tembu lalu nengah pejalai Kimpin Pengelikun enggau Pemeresi Sungai, kitai nyemetak madah baru pengeransing Sarawak nyaga Sungai ngambi likun agi, beresi sereta disikap enggau infrastruktur ti manah agi.

“Tu mega nentuka sistem pengangkut bejalai enggau chara ti likun, meruan sereta meri pemaik ngagai rayat ungkup timpuh panjai,” ku iya.-EDISI UKAS