Semua Atlit Nerima Midul, SOMNG26 Berat Ke Pengelantang
BINTULU: Semua atlit ti nurun bepekit ba Special Olympics Malaysia National Games 2026 (SOMNG26) deka nerima midul nyadi kelai basa ke pemerani sereta semangat sida ti udah ngambi bagi ba lumba nya, seriris enggau falsafah inklusif pekit nya.
Menteri Pemansang Indu, Nembiak Mit, Ruang Bilik enggau Pengelantang Komuniti Sarawak ti mega Presiden Special Olympics Sarawak, Dato Sri Fatimah Abdullah madah, tuju inisiatif nya nentuka tiap atlit dibasa enda ngira penuduk ba pekit, lalu meri pengandal diri enggau peransang beraban ngagai atlit begunaka bantu khas.
“Kelimpah midul emas, pirak enggau engkeraju, atlit bukai ti bepekit mega deka nerima midul nyadi basa ke pemerani sida udah nguji,” ku iya maya bejaku ba aum media serimbai SOMNG26, ditu, Hari Dua.
Berebak enggau nya, iya madah ke pekara pengelantang enggau pengerai atlit mega diberi perati nengah pejalai Program Atlit Gerai sepanjai pekit nya diatur.
Ku iya, program nya nyerangkung meresa pengerai baka meresa peninggi darah, meresa mata, pending sereta pengeregas tubuh dikena nentuka atlit ba tikas ti likun sereta gerai sepanjai pekit.
“Program tu besai amat reti dikena nemu tumu sebarang penanggul pengerai ngambi pekara nangkan nya ulih digaga,” ku iya.
Program Atlit Gerai nya deka diatur ba Sekula Primari Bansa China (SJK) Chung Hua, Bintulu ti ngaul raban perubat sereta voluntia ke udah dilatih.
Kelimpah ari nya, bisi 793 penyereta ngaul atlit, pelatih, deligit enggau pengiring ari 11 nengeri dipelaba ngambi bagi ba pekit nya, lalu ngangkatka pekit nya nyadi entara Special Olympics ke diatur pemadu besai ba renggat nasional.
