MUKAH: Program Lemai Lantang Unit Komunikasi Awam Sarawak (UKAS) enggau Kaban Kunsil Nengeri (ADUN) Tellian, Royston Valentine, mandangka kerejasama strategik tegap entara UKAS, Perintah Sarawak sereta Palan Servis Rayat ba menua.

Ku Royston, kaul nya besai reti nentuka pengawa bejalaika polisi, penerang sereta inisiatif perintah ulih dipejalai nengah chara ti efisyen, nyengala sereta komprehensif ngagai rayat.

“Kerejasama tu seriris enggau juluk pemansang Sarawak ti inklusif sereta komprehensif, ke alai penerang perintah datai terus ngagai rayat enggau betul,” ku iya maya bejaku ba program ke diatur ba MK99 Seafood Restaurant, Hari Dua.

Iya mega madah, tanggungpengawa besai UKAS nyadi agensi komunikasyen perintah ba nabur penerang, lebih agi bekaul inisiatif enggau pemujur pemansang ba nengeri tu.

Kelimpah ari nya, Direktor UKAS, Awang Putrayusrie Awang Redzuan madah, pengawa ngatur program nya ngembuan tuju masa kerejasama rat ti disintal entara UKAS enggau pengari rayat ba ngemujur macham program komunikasyen perintah.

“Program tu mandangka penyerakup entara agensi komunikasyen perintah enggau pengari rayat ba ngenegap pengawa ngenatai penerang sereta pejalai polisi perintah ungkup pengelantang rayat menua,” ku iya nerang.

Sama datai, Pegawai Tadbir Khas UKAS, Datu Takun Sunggah, Sapit Direktor UKAS, Mohamed Faizal Shah Ali, Tuai Penolong Direktor UKAS, Anwar Hanafi Ardimansyah sereta Pegawai UKAS Bagi Menua Mukah, Hafizzul Abdul Halim.- EDISI UKAS