SUEF Meri RM100,000 Ngagai PERKATA, Marit Mayuh Agi Sektor Peribit
KUCHING: Sarawak Unity Education Fund (SUEF) ngagih RM100,000 dikena mantu Serakup Pengintu Pengelantang Nembiak Mit Menawa Sarawak (PERKATA) nyadi sebagi ari pengeransing nyaup program pelajar enggau ngintu pengelantang gerempung nya.
Chairman SUEF, Datuk Richard Lee Say Tshin, madah gerempung baka PERKATA begunaka mayuh agi raban ari sektor peribit sama mantu sereta nyaup inisiatif pelajar ti dipejalai gerempung nya.
“Kami mega meri peransang sektor peribit menua nyaup PERKATA laban sida ngatur siti sekula enggau nembiak timpang pendiau.
“PERKATA udah berengkah ke pengawa pengelama 54 taun lalu sida bepanggai enggau pemeri mensia mayuh nyaup nembiak timpang pendiau lalau nya siti pengawa ti manah laban ukai mudah, tang sida udah ngereja pengawa nya sepengelama 54 taun.
"Nya alai, ngarapka pemeri mit ari kami ulih meri peransang ngagai sektor peribit bukai datai meri pemeri sida,” ku iya.
Iya madah munyi nya ba aum media pengudah ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, di Kompleks Satria Pertiwi, ditu, Hari Tiga.
Sama datai ba penemuai nya, Chairman Kaunsil Pemansng Ekonomi Sarawak (SEDC) Tan Sri Datuk Amar (Dr) Abdul Aziz Dato Husain.
Iya madah, SUEF naka tu udah ngagih 31 sekulaship ngagai nembiak Sarawak ti patut enggau kesemua iya nyampau RM1.4 juta lalu pemeri sehari tu, pemeri kedua sida ngagai PERKATA ke pengeran sida ba bidang pelajar enggau ngintu nembiak mit timpang pendiau ba kandang mengeri Kuching.
Sama datai, Penyanding Penemu SUEF Dato Sri Richard Wee Liang Chiat enggau Bendahari SUEF Datu Laura Lee Ngien Hion. -EDISI UKAS
