11,900 Pek Pemakai Diberi Ngagai 11 Agensi Serimbai Sumbangsih TBC 2026
KUCHING: Bisi 11,900 pek pemakai deka disadung ngagai 11 agensi baka Raban Soldadu Malaysia (ATM), Polis Diraja Malaysia (PDRM), Agensi Penerit Adat Maritim Malaysia (APMM) enggau Opis Bomba enggau Penyah Penusah Malaysia (JBPM) serimbai Program Sumbangsih Taun Baru China (TBC) 2026.
Program ninting taun ke diatur Opis Indu enggau Ruang Bilik Sarawak (JWKS) nya kelai penyiru sereta terima kasih Perintah Sarawak ngagai raban nyaga pengelikun enggau penerit adat ti gawa ngintu pengelikun sereta pengelantang mensia mayuh sepanjai hari besai.
Program Kelai Nyua Sumbangsih Taun Baru CHina 2026 deka dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg kena 13 Februari tu ba Kompleks Satria Pertiwi.
Dikena besikap manggai program nya, Program Nungkus Sumbangsih udah dipenyadi Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah di Wisma Wanita, Hari Tiga.
Pengawa nganjung, nerima enggau meresa kualiti produk dibekal ngagai Wisma Wanita udah digaga berengkah 2 ngagai 9 Februari tu tadi dikena nentuka tiap pek manah sebedau diberi.
Ba program sehari tu, bisi 4,000 kontena pemakai mujur dibungkus asil kerejasama pengari ari 11 agensi begulai enggau raban gawa JWKS.
Ungkup taun tu, pek Sumbangsih mega dikemanah nengah nyendia pemakai retort tauka ‘ready-to-eat’.
Tiap pek ngundan lima bansa pemakai enggau ai irup ti dikearap ulih mai pengaga ngagai raban ke gawa maya hari besai.
Sama datai, Sapit Menteri ba Opis Premier (Undang-Undang, MA63 enggau Kaul Nengeri-Perintah Besai) ti mega Chairperson Biro Indu SABERKAS Nengeri Sarawak, Datuk Sharifah Hasidah Sayeed Aman Ghazali sereta Direktor Opis Indu enggau Ruang Bilik Sarawak, Salma Jobeli.
Inisiatif tu dikearap ulih ngangkat semangat sereta ngaga ke ati raban pengelikun ti gawa sepanjai hari besai.- EDISI UKAS
