LAWAS: Perintah Sarawak negap pengawa matau ngagai projek besai di Lawas nentuka tembu nitih taga seraya nyamin empas pemansang ngagai adap utara nengeri tu.

Sapit Menteri ba Opis Premier Sarawak (Pengereja Kasar, Imigresyen enggau Patau Projek), Datuk Gerawat Gala madah, inisiatif suah matau nya nentuka sebarang isu dikelala tumu agi lalu diputar lengkas sereta enda ngeruga pejalai projek.

Ku iya, entara projek besai ti dipatau nyengkaum Palan Pusat Akuatik Lawas.

Pia mega, projek Jematan Lawas dipatau Agensi Pemansang Kandang Menua Utara (NRDA) udah tembu 83.8 peratus lalu disadang tembu sereta dipenyadi sebedau ujung taun tu enggau ulih nyadi ikon baru pelilih nya.

Iya madah munyi nya lebuh ngatur pejalai gawa seraya ngabas sekeda taba projek besai ba pelilih tu nyengkaum Palan Lawas, Jematan Lawas sereta Kompleks ICQS Mengkalap kena Hari Empat.

Ngenang silik, iya madah ke Kompleks ICQS Mengkalap disikap fasiliti ti chukup tang agi napi penanggul ari sukut orang gawa seraya isu ‘No Man’s Land’ di adan menua Brunei enggau Malaysia nyengkaum pemar pemansang infrastruktur ti deka dibai ngagai Opis Menteri Dalam Menua ungkup atur bukai.

Nangkan nya, ungkup Pos ICQS Ba’Kelalan, iya nerang ke begunan udah tembu digaga tang isu akses jalai agi nyadi pemar besai lalu pengawa nyeruri diatu ba renggat ditinda pengudah agih belanja disediaka perintah.

Bela datai, Kaban Parlimen Lawas Dato Henry Sum Agong, Direktor Kandang Menua Agensi Pemansang Kandang Menua Utara (NRDA) Datu Ubaidillah Abdul Latip sereta Direktor Unit Matau Pejalai Projek Sarawak (SIMU), Sapiah Daud. - EDISI UKAS