SELANGAU: Pengawa Nyiri Tuai Genturung Pendiau enggau Tuai Raban Bansa (KMKK) ukai semina kelai mangku pengawa, tang pengawa besai reti sereta manifestasyen pengandal rayat enggau iring tuai menua.

Kaban Kunsil Nengeri (ADUN) Tamin Ir. Christopher Gira Sambang madah, pengelebih siti nengeri enda semina bepanggai ba pemansang di mengeri besai aja, tang bepuguka pengentap sereta pemansang genturung pendiau sereta kandang menua pesisir.

“Rayat menua pesisir enda minta semua. Sida semina deka nentuka sida enda tinggal ari arus pemansang. Pemansang ke bendar iya nya pemansang ti ulih diasai semua,” ku iya.

Iya madah munyi nya maya bejaku ba Program Nyua Setipikit Nyiri KMKK Pelilih Selangau ungkup 2026–2027, ditu, Hari Tiga.

Iya ke nyadi pengari rayat kandang menua pesisir nemu juluk ati rayat menua pesisir ti begunaka perengka guna pemun, peluang ekonomi sereta tuai ti ulih ngamat peminta nya.

Nerang bekaul tanggungpengawa KMKK, iya madah, raban nya nyadi pugu pengelantang rayat sereta nyadi ‘jematan’ entara perintah enggau rayat ba menua.

“KMKK baka urat ba pun kayu, enti urat enda tegap, pun kayu nya muntang tumbang. Baka nya mih pemesai reti tanggungpengawa KMKK nentuka penyerakup enggau pengelantang rayat seruran dijaga,” ku iya.

Berindik enggau nya, iya madah, perintah nengeri nengah Bajet 2026 udah besetuju nikika elaun KMKK ngagai RM400 sebulan ketegal meda tanggungpengawa sida ke majak mar.

Taja pia, iya madah, pengawa nyiri nya pemun ngagai pengawa ti besai agi sereta tiap kus tauka program ti ngaul KMKK meseti bulih pemendar ari Opis Pelilih sereta Opis Residen dikena nentuka pejalai pengawa seriris enggau polisi sereta perambu pemansang nengeri.

Maya nya mega, iya bela nyebut pekara ba sekeda rumah panjai ti agi bedau nyiri Tuai Rumah taja udah chukup atur.

“Genturung pendiau ke nadai Tuai Rumah baka menua nadai pengari. Tiap genturung pendiau patut ngembuan tuai ti ulih ngembing, nyerakup sereta bejalaika pengawa pemansang,” ku iya seraya ngarap kuota Tuai Rumah ulih diperunding ditambah ba taun dudi.

Bekaul pemansang Sarawak maya hari tu, iya madah, nengeri tu diatu ba jalai pemansang ke tegap enggau infrastruktur ti majak manah sereta ba penuduk ti kering negi hak ba Sempekat Malaysia 1963 (MA63).

Iya mega ngelalau rayat ngambi majak ngentapka penyerakup enggau pengentap politik sereta meri sukung ngagai perintah Gabungan Parti Sarawak (GPS) ke dipegai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngambi agenda pemansang ulih ditampung.

Sama datai ba program tu Senator Rita Sarimah Patrick Insol enggau Pegawai Pelilih Selangau Yalin Asan.-EDISI UKAS