MUKAH: Palan Servis Kunsil Nengeri (DUN) enggau Parlimen patut sama besaup nentu sereta ngenatai 139 inisiatif Perintah Sarawak ulih dipejalai enggau mujur ungkup pengelantang rayat.

Kaban Kunsil Nengeri (ADUN) Tellian, Royston Valentine madah, ari baruh pegai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, mayuh inisiatif udah ditumbuh dikena ngintu pengelantang sereta nyungkak tikas pengidup rayat ba selampur nengeri.

Nitih ku iya, palan servis bejalaika pengawa nyadi penabur penerang bekaul polisi sereta bantu perintah ngambi rayat nemu agi.

“Palan Servis DUN enggau Parlimen patut sama besaup ngemujurka inisiatif ngemansangka Sarawak ungkup pengelantang rayat ngambi semua polisi sereta bantu ti disedia datai ba bala mayuh,” ku iya.

Iya madah munyi nya maya bejaku bejadika Program ‘Demi Rakyat: Taklimat Bantuan dan Inisiatif MEITD’, Yayasan Sarawak enggau KPWK begulai enggau Palan Servis DUN enggau Parlimen Zon Tengah ditu, Hari Tiga.

Program nya bela digulu ADUN Ngemah, Anyi Jana sereta Direktor Unit Komunikasi Awam Sarawak (UKAS), Awang Putrayusrie Awang Redzuan.

Nerang silik, Royston madah, pengawa ngatur program penerang enggau program kaul baka nya nyadi pelasar nentuka penerang ti dikenatai endang amat kelimpah meri awak ngagai pegawai palan servis bulih timbal sebedau siti pekara dibai ngagai renggat ke tinggi agi.

Kelimpah ari nya, Awang Putrayusrie madah, tanggungpengawa pegawai enggau staf Palan Servis DUN enggau Parlimen endang signifikan laban sida rintai mua ti semampai betemu enggau rayat.

Ku iya, kelimpah Opis Residen enggau Opis Pelilih, palan servis mega nyadi alai rayat betanya sereta bulih penerang bekaul inisiatif perintah.

“Nya alai, pegawai enggau staf palan servis petut nemu tiap inisiatif ke disedia Perintah Sarawak ngambi penerang ke dikenatai nyengala sereta betul,” ku iya.

Maya program nya, raban penyereta mega mending penerang silik ari pengari Opis Menteri Pelajar, Inovasyen enggau Pemansang Penau (MEITD), Yayasan Sarawak enggau Opis Menteri Pemansang Indu, Nembiak Mit enggau Pengelantang Komuniti (KPWK) bekaul macham bantu sereta inisiatif ti disedia Perintah Sarawak.-EDISI UKAS