Seni Mural Ngerichah Pengerami Ngintu 100 Taun Padungan
KUCHING: Pengeransing ngangkat sejarah enggau identiti Padungan nengah seni mural ukai semina ngenegap nilai pesaka, tang mandangka pengulih Kuching nyadi mengeri kreatif ti bepelasarka seni.
Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, seni mural tau nempa identiti visual ti ngemanahka agi gaya mengeri.
Ku iya, tu inisiatif strategik ngemanah landskap mengeri nengah seni ti semak enggau rayat, kelimpah nyungkak dagang temuai bepelasaraka budaya enggau sejarah.
“Projek tu digaga serimbai siti program lalu begunaka perambu silik. Kitai deka ngira pemesai reti iya enti deka ngaga ba alai bukai.
"Aku nemu diatu pekara tu siti pekara ti dikerindu ba raban pengempu begunan. Sida deka meda mural ba begunan diri empu.
"Nyadi, sida tau ngenataika perambu ngagai MBKS tauka opis menteri, lalu kitai deka nisih peminta nya,” ku iya maya bejaku ba aum media pengudah bejadika tujuh seni mural khas serimbai ngintu 100 taun Padungan, ti berambaika jaku 'Meraikan Satu Abad Sejarah, Budaya dan Komuniti' ke diatur Kaunsil Mengeri Kuching Selatan (MBKS) ditu, Hari Empat.
Mural nya digaga artis menua baka Leonard Siaw ti mandangka pejalai Padungan kenyau lebih seratus taun dulu, nyengkaum penatai komuniti China ti ngemansangka endur nya nyentuk nyadi entara palan ti besai reti ba mengeri Kuching sehari tu.
Ku Dato Sri Abdul Karim, Leonard udah nengkebang mayuh asil seni ikonik ba kandang menua ngelingi Kuching, nyengkaum ba India Street, Batu 10 sereta mural bepelasarka raban jazz di Riverside Hotel.
Nambah ke jaku iya, iya madah, asil seni baka nya nempa Kuching nyadi vibrant agi sereta matak orang mayuh datai lalu mantu ngelakuka mengeri Kuching nengah bekunsi gambar ba media rama.
Program nya mega digulu Sapit Menteri Dagang Temuai, Industri Kreatif enggau Seni Pemerindang Datuk Snowdan Lawan, Datuk Bandar MBKS Dato Wee Hong Seng, Sekretari Mendam Opis Menteri Dagang Temuai, Industri Kreatif enggau Seni Pemerindang Morshidi Fredrick sereta temuai dipebasa bukai.-EDISI UKAS
