SRI AMAN: Sekretari Perintah Sarawak, Datuk Amar Mohamad Abu Bakar Marzuki udah ngatur penemuai gawa ke Opis Pelilih Pantu, Opis Pelilih Mit Engkilili enggau Opis Pelilih Lubok Antu, Hari Empat.

Penemuai keterubah iya dipun ba Opis Pelilih Pantu alai Residen Bagi Menua Sri Aman, Mahra Salleh nerang pelin ngaga Opis Pelilih Pantu baru enggau kuaters staf.

Nangkan mending ke penerang ari Pegawai Pelilih Pantu, Raca Mulong sereta ngabas taba projek, Datuk Amar Mohamad Abu Bakar enggau raban iya udah nya nampung penemuai gawa ngagai Opis Pelilih Mit Engkilili.

Pegawai Pelilih Lubok Antu Akoi Ejau nerang taba ngaga kuarters baru ungkup 13 staf Opis Pelilih Mit Engkilili udah dikemendar.

Akoi mega madah, tiga langgur taba dikena ngaga Opis Pelilih Mit Engkilili ti baru iya nya ba taba A, ba tanah perintah nengeri enggau 1.51 ekar pemesai, tapa B tanah bisi orang ngempu 4.99 ekar pemesai enggau taba C tanah bisi orang ngempu 7.87 ekar pemesai.

Datuk Amar Mohamad Abu Bakar enggau raban iya udah nya ngabas langgur taba ngaga kuarters staf Opis Pelilih Lubok Antu.

Dulu ari nya, Datuk Amar Mohamad Abu Bakar ba jaku iya ba Opis Pelilih Pantu madah ke iya deka meda projek digaga enggau lengkas ngambi ke enda disebut agi ba Aum Kunsil Nengeri (DUN) Sarawak deka datai.

"Kitai diatu ba taun bejalaika pengawa. Nya alai, aku deka semua raban enda ngira bansa gawa nyadi siti tim ngambi projek tu ulih digaga lengkas,” ku iya.

Bela bisi maya penemuai gawa nya, Sapit Sekretari Perintah Sarawak (Administrasyen), Datu Felicia Tan Ya Hua.-EDISI UKAS