KUCHING: Perintah Sarawak beterima kasih ke pengeransing raban pengintu pengelikun ti gawa enda ngira jam, nyengkaum maya musim hari besai nentuka pengelikun nengeri semampai dijaga.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, maya rayat ngintu hari besai enggau diri sebilik, mayuh raban pengintu pengelikun meruan ransing bejalaika pengawa, lebih agi lebuh statistik mandangka penyampau orang tama ke Sarawak nyengala mayuh maya musim hari besai.
“Kitai nguji mantu ngambi sida meruan berasai lantang maya hari besai taja jauh enggau diri sebilik,” ku iya.
Iya madah munyi nya ba Program Kelai Nyua Sumbangsih Taun Baru China 2026, di Kompleks Satria Pertiwi, ditu, Hari Lima.
Nambah ke jaku iya, Premier Sarawak madah, inisiatif meri Sumbangsih ba hari besai bukai kelimpah Hari Raya datai ari niang bini iya Puan Sri Datuk Amar Juma’ani Tuanku Bujang.
“Aku andal tu ulih kitai tandu lalu laban bisi penambah tu, taun tu kitai ngungkup RM5.1 juta ungkup program baka tu," ku iya baru.
Ba taun tu perintah nengah Opis Indu enggau Ruang Bilik Sarawak deka meri 11,900 kontena pemakai ngagai 11 agensi penerima.
Entara penerima iya nya, Raban Soldadu Malaysia (ATM), Polis DiRaja Malaysia (PDRM), Agensi Penerit Adat Maritim Malaysia (APMM), Opis Bomba enggau Penyah Penusah Malaysia (JBPM), Opis Jil Malaysia (JPM), Opis Imigresyen Malaysia (JIM), Opis Kastam Diraja Malaysia (JKDM), Opis Pengangkut Jalai (JPJ), Raban Penyaga Orang Periman Malaysia (APM), Opis Voluntia Malaysia (RELA) sereta Unit Pengelikun enggau Penerit Adat Sarawak (UKPS).
Sama datai, Sapit Premier Sarawak Datuk Amar Profesor Dr Sim Kui Hian, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nasar, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Menteri Industri Pemakai, Komoditi enggau Pemansang Kandang Sarawak Dato Sri Dr Stephen Rundi Utom, raban Sapit Menteri Sarawak, raban tuai opis perintah sereta temuai dipebasa ke bukai.-EDISI UKAS
