SIBU: Aum bekaul penusah blok begunan unit kedai ba Jalai Pahlawan ti tekerap deka diatur kena 23 Februari tu ngambi berati ke ripot teknikal ti deka dibantai Opis Kereja Raya (JKR) sereta penemu pakar bekaul.

Sapit Menteri Pengerai Mensia Mayuh, Pengawa Berumah enggau Perintah Lokal, Datuk Michael Tiang Ming Tee madah, pemutus silik nyengkaum timpuh nutup endur nya enggau atur ti patut ba struktur begunan nya deka bepanggai ngagai asil ripot nya.

“Kitai meseti nentuka semua sukut pengelikun mensia mayuh dikemerat berindik ari penusah begunan tekerap tumu pagi tadi lalu endur ngelingi nya diatur ditutup nyentuk dipadah ila.

“Kitai nemu agi bisi produk dagang enggau barang berega dalam begunan nya.

“Tang, pengelikun nyadi lumur satu,” ku iya ba aum pemberita pengudah baum bekaul penusah nya ba Opis Kaunsil Mengeri Sibu (MPS), kena Hari Lima.

Ku Datuk Michael, nitih ke perati enggau video ti ayan, struktur begunan nya agi bedau tegap lalu bunyi tekerap agi didinga.

Berebak enggau nya, ku iya, jalai ngelingi nya udah ditutup nyengkaum ngagai entukar berat nentuka mensia mayuh enda semak struktur begunan nya.

Atur nya diaku ngenusah ngagai pengempu kedai besemak nyengkaum siti restoran ba sepiak begunan nya.

“Kitai nemu pengawa tu ngenusah pedagang enggau penyuwa, tang kitai berasai lantang laban penusah nya nadai ngeripot sebarang penusah bakal,” ku iya.

Kaban Kunsil Nengeri (ADUN) Pelawan mega madah, nitih Undang-Undang Kecil Bangunan, orang ti bekaul ti mantaika pelin asal meseti ngelala sereta ngeripot pun penyadi pemuntan struktur ba timpuh tujuh hari ari haribulan penusah nya nyadi.

“Kitai dipadahka orang ti bekaul (qualified person) udah datai ba aum sehari tu lalu deka mantaika ripot silik ba timpuh ditetapka tauka bejuraika pekara nya ba aum ke deka datai,” ku iya.

Ku iya agi, nyema pansik tetemu ke begunan nya enda likun agi ari sukut struktur, raban bekuasa deka ngenuku ke nya nyadi begunan enda likun lalu minta pengempu kedai nya ngererak begunan nya.

“Pengempu meseti ngererak enggau ngupas bekaul tekerap nya sebedau jalai ulih dibuka baru. Sekali ke deka ngaga baru tauka enda, nya bepanggai ngagai pengempu kedai laban nya tanah sida empu,” ku iya.

Iya mega madah, timpuh nutup endur nya bepanggai ngagai asil pansik enggau pemutus teknikal tang raban bekuasa meri jamin atur silik deka diadu lengkas ke pengelikun mensia mayuh.

Sama datai, Chairman MPS, Clarence Ting Ing Horh.-EDISI UKAS