KAPIT: Bisi 11 Tuai Rumah baru nerima setipikit dichiri seraya tiga da nerima setipikit nampung pengawa ba sebengkah pengawa ti diatur ba Hotel Meligai, Rahmat Cafe, Pelilih Bukit Mabong kena Hari Lima.

Ba pengawa nya, setipikit ngenang jasa mega disua ngagai Tuai Rumah ti abis timpuh sereta ti nyurutka diri kelai ngaku jasa sida ngemudi komuniti.

Sapit Menteri Digital Malaysia ti mega Parlimen Hulu Rajang Datuk Wilson Ugak Kumbong madah, Tuai Rumah enggau Tuai Raban Bansa ngesan pangku pengawa besai nyadi jematan entara rayat enggau perintah nentuka polisi sereta inisiatif pemansang ulih dipejalai nemban agi ba renggat baruh.

Iya ngelalau Tuai Rumah ti baru dichiri ngesan pangku pengawa enggau penuh integriti, nyukung polisi perintah sereta nambah tikas literasi digital lalu nentuka bantu disadung nemban agi.

“Tuai Raban Bansa enggau Tuai Rumah mangku pengawa besai nyadi jematan rayat enggau perintah.

“Nentuka genap bantu sereta penerang perintah ulih dikenatai enggau betul sereta nemban ngagai peranak,” ku iya.

Datuk Wilson mega nyemetak madah ke pemesai guna atur pengawa ti manah, atur pekara wang ti lurus, nyaga adat enggau budaya lokal sereta kerejasama rat enggau raban Residen, Pegawai Pelilih enggau agensi perintah nentuka pengelantang komuniti terus dijaga.

Pengawa diatur Opis Pelilih Bukit Mabong nya mega digulu Kaban Kunsil Nengeri (ADUN) Baleh Nicholas Kudi Jantai, Residen Bagi Menua Kapit Elvis Didit, Pegawai Pelilih Bukit Mabong Jabang Juntan sereta Pegawai Pelilih Kapit Thomas Geoffrey Kandawang.-EDISI UKAS