BETONG: Semangat begulai enggau penyiru tebantai nengah Program Outreach Opis Menteri Pemansang Indu, Nembiak Mit enggau Pengelantang Komuniti (KPWK) begulai enggau bakih strategik ungkup Zon Betong 2026 ti besuluka jaku “Kamek Prihatin, Kitak Penting”.
Program nya richah agi enggau penatai Sapit Premier Sarawak Datuk Amar Douglas Uggah Embas begulai enggau bini, Datin Amar Dato Doreen Mayang, Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah sereta Sapit Menteri Pengelantang Komuniti Sarawak Datuk Mohammad Razi Sitam.
Kaban Parlimen Betong Dato Dr Richard Rapu, ADUN Beting Maro Dato Razaili Gapor, ADUN Kalaka Mohammad Duri, Chairman Sarawak Digital Economic Corporation (SDEC) Tan Sri Datuk Amar Mohamad Morshidi Abdul Ghani enggau Residen Bagi Menua Betong Datu Richard Michael Abunawas mega bisi datai.
Lebuh bejaku, Dato Sri Fatimah Abdullah nyemetak madah ke inisiatif outreach tauka ngaul komuniti nya jematan beguna entara perintah enggau rayat nentuka genap inisiatif ngintu pengelantang datai ngagai raban dituju.
Ku iya, program baka tu ukai semina pengawa rasmi, tang mega nyadi pelasar strategik ngenatai penerang, ngemuntang akses ngagai bantu sereta mekuh rentayan kerejasama entara opis menteri enggau bakih strategik.
“Tu mih outreach keterubah ungkup taun 2026, bisi agi outreach ke bukai. Taun nyin tadi, kitai bisi ngatur tiga kali.
“Kitai udah netapka KPI nentuka program tu‘Kamek Prihatin, Kitak Penting’datai ngagai selampur Sarawak,”ku iya ba program nya ti diatur ba Balai Komuniti Spaoh kena Hari Enam.
Iya mega meri terima kasih ngagai semua raban ti ngambi bagi ngemujur program nya seraya bukti pengeran nentuka pengelantang rayat semampai nyadi agenda besai.
Ku iya agi, perintah nengeri diiring Premier Sarawak majak bejalaika mayuh inisiatif ngintu pengelantang nyerangkung pekara pelajar, negap raban indu, bantu ruang bilik kurang penatai pemisi, sukung ngagai gerempung ukai dikuasa perintah (NGO) sereta pemaik pengerai ungkup orang tuai.
“Inisiatif ngabas nengah program outreach tu dikeandal ulih ngerapit kaul entara perintah enggau komuniti lokal seraris enggau juluk pemansang inklusif nengeri nentuka nadai rayat tinggal ari arus pemansang,” terang iya baru.
Program Outreach KPWK Begulai Enggau Bakih Strategik: "Kamek Prihatin, Kitak Penting" Zon Betong Taun 2026 ti diatur pengelama dua hari iya nya 14 nyentuk 15 Februari 2026 di Balai Komuniti Spaoh nengah mayuh penerang, demonstrasyen enggau nyendia 24 reruai pemandang, kaunter servis opis, agensi perintah enggau NGO. - EDISI UKAS
