20 Tuai Rumah N.34 Batang Ai Nerima Setipikit Dichiri
LUBOK ANTU: Bisi 20 Tuai Raban Bansa (Tuai Rumah) ungkup sitak Batang Ai dipegai Opis Pelilih Mit Engkilili nerima setipikit dichiri ba sebengkah pengawa ti diatur ba Rumah Edat Anak Intan, Lubok Subong, Lemanak ditu, kena Hari Enam.
Pengawa nyuaka setipikit nya udah dipenyadi Sapit Menteri Dagang Antarabansa, Industri enggau Pengawa Meranak Puku Sarawak ti mega Kaban Kunsil Nengeri (ADUN) Batang Ai, Datuk Malcolm Mussen Lamoh.
Pegawai Pelilih Lubok Antu, Akoi Ejau madah ke semua 20 Tuai Rumah nya nerima surat dichiri nyadi Tuai Raban Bansa dipegai Opis Pelilih Mit Engkilili.
Iya mega madah ke Pelilih Mit Engkilili diatu ba perambu diangkat nyadi Pelilih Menua lalu deka bisi Pegawai Pelilih kediri empu, nitih ke pemutus raban bekuasa.
Pengawa nya mega ngemerat sekeda pekara ti beguna ngaul pangku pengawa enggau bidang kuasa Tuai Raban Bansa enggau Tuai Komuniti (KMKK).
Tu nyengkaum Tuai Rumah enggau Penghulu dikemendar ngenuku pom rasmi tang enda dikemendar ngenuku salin setipikit, prosedur mindah hak ngempu senapang patah ngagai anak pengempu ti agi idup, malin ngempu anak iru sereta pangku pengawa KMKK ngelala penerima bantu ngintu pengelantang nitih atur ti ditetap.
Pengawa nerang ke pekara nya beguna endar dikena nambah pemereti tuai renggat baruh bekaul tanggungpengawa enggau nyaga pengelantang komuniti nipak atur ti diterit. -EDISI UKAS
