Ku Sapit Premier Sarawak, Datuk Amar Douglas Uggah Embas, taba numbuh palan latih pengelandik nya udah dikelala ba Betong lalu projek nya dikearap ulih dikemujur ba timpuh enda lama da dikena nyendia fasiliti latih pengelandik ngagai peranak lokal.

“Penumbuh palan latih nya ila deka nyendia mayuh agi peluang ngagai nembiak enggau komuniti ngelingi nya dikena ngansah pengelandik teknikal sereta pengelaku pengereja pengawa dia,” ku iya.

Iya madah munyi nya ngagai pemberita pengudah bejadi Program Outreach KPWK Begulai Enggau Bakih Strategik: "Kamek Prihatin, Kitak Penting" Zon Betong Taun 2026 ba Balai Komuniti Spaoh kena Hari Enam.

Sama datai, Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah, Sapit Menteri Pengelantang Komuniti Sarawak, Datuk Mohammad Razi Sitam, Kaban Parlimen Betong, Dato Dr Richard Rapu, Kaban Kunsil Nengeri (ADUN) Beting Maro, Dato Razaili Gapor enggau ADUN Kalaka, Mohammad Duri.

Ba lansa bekaul infrastruktur, iya mega madah ke bisi semilan projek jematan ba selampur Sarawak disadang tembu taun tu baka Jematan Batang Lupar 1, Batang Igan, Batang Krian, Sungai Limbang, Batang Lupar 2, Batang Paloh, Batang Saribas 2, Sungai Sejingkat enggau Batang Rambungan.

Iya ti mega Menteri Infrastruktur enggau Pemansang Penyangkai Kapal Sarawak nyemetak madah ke pengandal ngagai semua projek nya deka digaga tembu nitih taga seraya madah ke raban Opis Kereja Raya (JKR) udah dipinta matau pejalai projek nya.

Inisiatif nya, ku iya, beguna amat nentuka sebarang isu ti ditapi kontraktor ulih dikelala enggau diputar lengkas ngambi enda ngeruga pejalai projek nya.

“Pemujur nembuka projek infrastruktur strategik sereta pemansang palan latih pengelandik baka CENTEXS deka meri empas besai ngagai pemansang ekonomi lokal enggau nyamin pengelantang rayat ba Sarawak, kelebih agi ba Bagi Menua Betong,” ku iya baru. - EDISI UKAS