Kuching City ‘ngalahka’ DPMM FC 3-1, tama slot semifinal Piala Malaysia
KUCHING: Kuching City FC nurai sejarah baru pengudah keterubah tama renggat semifinal Piala Malaysia pengudah ngalahka DPMM FC enggau pemutus 3-1, malam tadi.
Main nya mega richah enggau penatai Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar sereta bini, Toh Puan Datuk Patinggi Fauziah Mohd Sanusi di Stadium Negeri.
Skuad The Cats mantaika bulu siga ba minit keterubah main pengudah mujur nguasa enggau nyipak dua gol ari Ronald Ngah Wanja enggau tuai tim, James Okuwosa sebedau pemain warisan Gabriel Palmero nyipak gol ketiga tuai rumah ba minit ke-69.
Tuai Jurulatih Kuching City FC, Aidil Sharin Sahak meri terima kasih ngagai bala pemain laban ngembuan komitmen sereta disiplin taktikal ti dipandang sepanjai bemain.
“Kredit meseti diberi ngagai bala pemain laban bemain nitih pengelebih kediri empu lalu ukai semina beretan, sida bemain nitih utai ti diperambu enggau manah,” ku iya ba aum pemberita pengudah main nya.
Nangkan nya, Tuai Jurulatih DPMM FC, Mcallister James Reynold ngaku tim iya lubah bemain ba setengan minit keterubah nyentuk meri peluang ngagai tuai rumah nguasa main.
“Kami enda bemain enggau manah ba setengan minit keterubah lalu ngeleas dua gol ti patut ulih diseliah,” ku iya.
Taja pia, iya muji pengeransing bala bemain ti majak manah ba renggat kedua.
“Bala pemain bebendar bemain ba setengan awak kedua lalu kami naka ulih ngalahka tim bukai. Tu siti main ti chukup manah diumbaka sukung ari bala penyukung chukup manah,” ku iya.
Iya mega madah, bepelasarka pemanah dua main nya, Kuching City FC enda patut tama ngagai renggat semifinal.
Pemujur 3-1 nya mega ngenuku slot Kuching City ngagai semifinal enggau agregat 6-2 pengudah pemujur sebaka diulih ba Bandar Seri Begawan kena 8 Februari tu tadi.
The Cats disadang bepadan enggau champion Piala Malaysia 33 kali, Selangor FC ba semi final lalu Aidil ngasai ke nya nyadi pemar baru. - EDISI UKAS
