KUCHING: Perintah Sarawak madah ke pengeran taun tu deka mai pemujur besai ngagai mayuh inisiatif strategik nengeri ti dilanggur dikena negap ekonomi, pelajar, kuasa enggau teknologi tinggi.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, entara perati besai iya nya nambah penerebai AirBorneo ngagai palan serantau dikena nambah penyambung sereta meransang sektor dagang temuai enggau dagang.

”Aku andal ke Taun Kuda 2026 deka mai pemujur ngagai inisiatif strategik nyengkaum nambah penerebai AirBorneo ngagai palan serantau enggau Palan Penyangkai Kapal Bintulu ti udah dipulai Perintah Besai ngagai Sarawak nyadi penyangkai kapal besai Sarawak,” ku iya.

Iya madah munyi nya nengah pesan Taun Baru China 2026, kena Hari Minggu.

Ba sukut pemansang modal mensia, pengawa bejalaika Pelajar Tinggi Pechuma Sarawak (FTES) ti belabuh taun tu dipeda nyadi inisiatif besai nempa pengereja landik ba Anak Sarawak.

Ku iya, inisiatif nya meri peluang besai agi ngagai rebak biak nampung pelajar tinggi lalu nyadi aset strategik ngagai pemansang nengeri.

Ba lansa bukai, iya mega bekunsi pemansang mengeri Kuching ti disadang nerima servis ‘Autonomous Rapid Transit’ (ART) bekuasa hidrogen keterubah di rantau ASEAN ba suku kepenudi 2026.

“Inisiatif tu mandangka juluk Sarawak nyadi pemungkal enggau tuai nuju ekonomi enggau teknologi baruh karbon ba rantau ASEAN,” ku iya baru.

Berebak enggau nya, pun taun 2026 ngemata pemujur Sarawak nyambung grid kuasa karan nengeri enggau Sabah ngambi nyambung urung 50 megawatt kuasa karan.

Pengawa nyambung nya ti kedua pengudah Sarawak mekal kuasa gadung entara 190 nyentuk 200 megawatt ngagai Kalimantan Barat kenyau ari taun 2016.

Kuasa karan mega disadang disambung ngagai Brunei dudi hari nengah pengawa numbuh Grid Borneo ti ngena pemansut kuasa gadung Sarawak ba selampur pulau nya.

Ari sukut kerejasama serantau, taun 2026 mega ngerandang pengulih kaul rat agi entara Malaysia enggau Indonesia kelebih agi ba pengawa mansut sereta nyambung kuasa gadung ngilah adan menua enggau pemansang teknologi tinggi.

“Dua minggu ti udah, aku udah ngulu Konferens Ekonomi Indonesia 2026 ke alai Menteri Penyeraris Pekara Ekonomi Indonesia udah madah ke pengingin nanggam kerejasama enggau Sarawak ba bidang semikonduktor laban Sarawak udah mandangka pemujur ba bidang tu,” terang iya. -EDISI UKAS